Колку протеини треба да внесувате дневно (ако сакате да изградите мускулна маса)?

Количество протеини што треба да го внесите зависи од физичката активност. Ако сте главно неактивни, тогаш сигурно внесувате доволно преку храна. Но, ако вежбате интензивно секој ден, а сакате да изградите и мускулна маса, тогаш ќе ви треба поголемо количество, а во консултација со експерт, можеби ќе ви требаат и суплементи.

Ако користите социјални мрежи, сигурно сте налетале на безброј видеа со рецепти за оброци богати со протеини, но и совети како да го зголемите внесот на протеини.

И, факт е дека изминативе неколку години протеините се главна тема на разговор кога е во прашање здрав живот и начин на исхрана.

Но, дали навистина не внесуваме доволно протеини и треба да бидеме опседнати со нив?

Треба да се нагласи дека иако протеините се неопходни за нашиот организам, ако претерате, можете да се соочите и со последици по здравјето.

Па, колку протеини треба да внесувате дневно?

Колку протеини му се потребни на нашето тело?

Генерално, треба да внесуваме околу 0,8 грама протеин за секој килограм од нашата тежина.

На пример, ако имате 68 килограми, тогаш би требало да внесувате околу 54 грама протеини дневно.

Но, ова правило не важи за секој. Некои нутриционисти сметаат дека 0.8 грама на килограм е минималното количество што треба да го внесуваме и дека на некои луѓе, во зависност од низа фактори, може да им треба и повеќе.

Како да пресметате колку протеини ви се потребни?

Ако сметате дека не внесувате доволно протеини, секогаш е најдобро да се консултирате со лекар или нутриционист.

Но, можете и сами да направите груба пресметка, во зависност од физичката активност.

За оваа цел можете да го искористите водичот од 2016-та направен од страна на Royal Society of Chemistry.

Во зависност од нивото на физичка активност, помножете ја вашата тежина со дадениот број:

Минимална физичка активност, главно активности како домашни обврски – помножете со 0,8

Мала физичка активност, како 30-тина минути пешачење или лесни вежби – помножете со 1

Бременост или редовна физичка активност, како умерено вежбање еден час дневно, интензивно вежбање половина час дневно или џогирање – помножете со 1,3

Интензивна физичка активност, како интензивен тренинг 45-60 минути дневно – помножете со 1,6

Добиениот број покажува колку грамови протеин треба да внесете дневно.

Колку протеини ви се потребни ако сакате да изградите мускулна маса?

Според експертите на Харвард, ако сакате да изградите мускулна маса, тогаш треба да внесувате 50% повеќе протеини од личност која главно не е физичка активна. Односно, околу 1,2 грама на килограм од вашата тежина.

Но, важно е да знаете дека зголемениот внес на протеини нема да ви помогне во градењето мускулна маса ако не вежбате.

Мускулната маса се зголемува со комбинација од вежби со тежина и соодветна исхрана.

Ако планирате да го зголемите внесот на протеини, секогаш е добро прво да се консултирате со експерт за да ги намалите можните ризици.

Дали ви требаат суплементи со протеин?

И во овој случај треба да се консултирате со експерт. Ако сте малку физички активни, тогаш веројатно внесувате доволно протеини преку храната.

Ако планирате да почнете со интензивно вежбање, можеби ќе ви требаат суплементи, но сепак прво треба да се потрудете да ги внесете протеините преку храна.

Ако не јадете храна од животинско потекло, тогаш консултирајте се со експерт за внесот на протеини.

Важно е да знаете и дека месото не е единствениот извор на протеин – друга храна богата со протеини вклучува јајца, сирење, путер од кикиритки, наут, грашок…

Погледнете и: Храна од растително потекло која е богата со протеини – ако не сте љубители на месо

Спирова С. | Црнобело