Храна од растително потекло која е богата со протеини – ако не сте љубители на месо

Храната од животинско потекло има најмногу протеини, но не значи дека ако сте веган или вегетаријанец ќе се соочите со недостаток од оваа хранлива материја. Треба само да научите нешто повеќе за протеините...

Ако сте одлучиле да бидете веган или вегетеријанец, или едноставно не сте љубител на месо, сепак мора да внесувате протеини во телото и да научите нешто повеќе за нив. 

Со познавање на хранливите состојки и со добра комбинација и планирање на оброците, ќе може да го одржите здравјето на добро ниво. 

Која е разликата помеѓу растителни и животински протеини?

Факт е дека храната од животинско потекло има многу повеќе протеини од растителната, но со добро планирање на оброците не би требало да се соочите со недостаток од протеини.

Протеините се создаваат со комбинација на 20 различни аминокиселини, од кои 9 се сметаат за клучни - телото не може да ги произведе, па мораат да се внесат преку храна.

Кога некоја храна ги содржи овие 9, се вели дека е „целосен протеин“. Храната од животинско потекло, како месо, млечни производи и риба, се смета за целосен протеин.

Од друга страна, поголемиот дел од храната од растително потекло не спаѓа во оваа категорија.

Кај растителната храна богата со протеини има недостаток од некои материи, како витамин Б12, железо и омега 3 масни киселини.

Но, во оваа храна има повеќе хранливи влакна, а помалку калории и заситени масти.

Секој начин на исхрана си има предности и недостатоци. Ако воопшто не јадете месо и храна од животинско потекло, со внимателно избирање на оброците можете да го внесете потребното количество протеини во текот на денот.

Храна од растително потекло која е богата со протеини:

Киноа

Киноата спаѓа во категоријата „целосни протеини“ и не само што е богата со протеини, туку изобилува и со хранливи влакна.

Една шолја варена киноа има околу 8 грама протеини, 5 грама хранливи влакна и 222 калории.

Варената киноа можете да ја користите како замена за ориз, но и како додаток во салати или супа.

Тофу

Тофуто е всушност сирење направено од соја и покрај многуте протеини, богато е со важни минерали, како калциум и магнезиум.

И ова е храна која спаѓа во категоријата целосни протеини. Во 80 грама тофу има околу 8 грама протеини и само 80 калории.

Постојат многу начини на приготвување тофу, но бидејќи има многу слаб вкус, ќе треба да користите повеќе зачини.

Леќа

Бидејќи леќата има вид јаглехидрати кои се дигестираат побавно и го регулираат нивото на шеќер во крвта, таа е одлично јадење за дијабетичарите.

Покрај тоа, леќата е богата со протеини, а има малку калории. Во една шолја варена леќа има 18 грама протеини и 230 калории.

Наут

Покрај другите корисни хранливи материи, наутот е богат и со фолна киселина. Една шолја наут има 15 грама протеини, 70 микрограма фолна киселина, како и 260 калории.

Прочитајте и Што сè треба да знаете за недостатокот од протеини во организмот?

Спирова С. | Црнобело