Како да не се здебелите за време на празниците?

Зимскиот период е еден од најубавите периоди исполнет со семејни и пријателски дружби.

Славите и новогодишните празници се моменти во кои сите уживаме овој период, но и малку се опуштаме кога станува збор за „линијата“.

Прекрасните трпези постојано нè мамат и тераат да си јадеме малку повеќе, а често знае да се претера и со алкохолот, што секако, влијае на качувањето по неколку килца.

Па, за да го избегнете тоа во овие денови, треба да бидете повнимателни, а за тоа постојат неколку трикови.

Колку и да е тешко, вреди да ги пробате за потоа да не се каете, мачејќи се со месеци да ги изгубите килограмите:

Избегнувајте премногу комотна облека

Првото правило до кое треба да се придржувате овој период е да избегнувате растеглива и широка облека.

Доколку постојано сте облечени во комотна и широка облека, може да се случи воопшто да не забележите дека килограмите почнуваат да се познаваат.

Затоа зимата поминете ја во хеланки, тесни туники и зимски фустанчиња, или мажите во панталони и џемперчиња кои не се многу широки, па така постојано ќе сакате да изгледате добро и нема да си дозволувате дебелеење.

Поставете си цел

Не би било лошо да си поставите новогодишна цел пред нова година, како на пример, да се запишете на вежбање од 1-ви јануари. Точно, во тој период има многу празници, но не смеете да си дозволите тоа да биде изговор, бидејќи токму така се дебелееме – „Да поминат празнициве, па ќе почнам“.

Доколку почнете да вежбате уште од почеток на месецот, можеби тоа поинаку ќе влијае на вас и ќе бидете малку повнимателни со исхраната, а истовремено ќе ги трошите внесените калории.

Контролирајте се

И секако, сè би било залудно доколку самите вие немате контрола над себе и не знаете да се сопрете.

Обидете се да не претерувате со количината, иако сакате да пробате од сите традиционални мезенца и јадења. Јадете во мали чинии и избегнувајте прејадување само затоа што храната е слатка.

Не заборавајте и дека пијалаците со шеќери, како и алкохолот исто така влијаат на дебелеењето доколку се претера.

За време на празниците, држете се до виното (умерено) и природните сокови.

М. М. | Црнобело