Христијан Стојановски за животот во Тајван: „Присуствував на реална воена вежба, го посетив најголемиот храм“

Детали

сабота, 07 октомври 2023

„Тајван е една од ретките држави каде сите се активни на спортски план. Во спортските центри не одат само млади, туку и луѓе на возраст од 60 до 80 години, па и повеќе. Тие се во подобра физичка форма од двојно помлади луѓе во другите земји, што ми беше шокантно“, вели моделот Христијан Стојановски, кој 3 месеци живее во Тајпеј.

Македонскиот интернационален модел Христијан Стојановски, откако живееше и работеше во Индија, Индонезија и на Филипините, се пресели во Тајван. Таму е веќе 3 месеци, а живее во главниот град, Тајпеј.

Иако има многу модни ангажмани, кастинзи и фотосесии, Христијан наоѓа време и да ужива и да ја истражува земјата, за која вели дека е прекрасна.

Тој за CRNOBELO.com раскажува за времето поминато во Тајван и работите кои му оставиле најсилен впечаток.

„Иако е мала држава-остров, Тајван се смета за една од најнапредните држави, не само на Пацификот, туку и во светот. 

Најпознати се по микрочиповите кои ги произведуваат, а од кои зависи цел свет бидејќи се користат секојдневно и насекаде.

Но, покрај тоа што се технолошка велесила, не може да се занемари убавината на оваа држава, како и необичните градови исполнети со зеленила, будистичките храмови, тесните улички во кои доминираат кинеските симболи, како и втората највисока зграда во светот (по Burj Khalifa во Дубаи) - 101 Building.

Разновидноста на нивната храна, исто така, ми остави огромен впечаток. Има доста локални ресторани каде што има супер избор и што е најважно - сè е свежо.

Бидејќи е остров, секогаш и секаде има голем и одличен избор на свежа риба и секаков вид морски плодови.

Но, се навикнав и на нивните локални специјалитети како говедска супа од нудли, тофу, локални овошни плодови и слично.

Со сигурност можам да кажам дека Тајван е една од ретките држави што сум бил, а каде луѓето се грижат за себе и се доста активни на спортски план.

Во спортските центри не одат само млади, туку и луѓе на возраст од 60 до 80 години, па и повеќе.

Тие се во подобра физичка форма споредено со двојно помлади луѓе во другите земји, што лично за мене беше шокантно, но и секаде го раскажувам како позитивен пример што треба да го следиме.

Продолжува на следната страница...