Ивана Јариќ: „Љубовта ме одведе во Бразил, јавниот превоз им е ужасен, плажите - рај“

Дали е безбедно да се движиш слободно насекаде?

Во нашиот град да, додека во Рио и Салвадор не, таму има висока стапка на криминал. Кога бевме во Рио ми рекоа да излезам без накит, дури и бурмите ги извадивме, земавме само кеш со нас, и мобилните телефони постојано во рака.

На мојот сопруг Луис му го украдоа мобилниот од џеб на улица во Рио. Има многу кампањи и постери кои предупредуваат на крадци и џепчии. Секако дека не ни се приближивме на опасните зони.

Какви се цените? 

Кафето е вкусно и евтино, дури и за 1 реал (околу 10 денари) може да се купи шолја црно кафе. Интересно е што пијат само црно кафе во мали шолјички. Очекував повеќе различни вкусови и видови на кафе, но Бразилците преферираат црно и силно кафе.

Пивото варира, лименка пиво меѓу 1,75 до 5 реали (од околу 17 до околу 50 денари) зависно од марка. Увозните пива се поскапи.

Во бар е околу 5 реали (околу 50 денари) едно шише. Каипириња, традиционален бразилски коктел е околу 10 реали (околу 100 денари) во бар или на плажа. Слободно ќе кажам дека Бразилците се зависни од пица и тоа пица на испорака до дома.

Најевтината, само кечап и кашкавал е само 10 реали (околу 100 денари), најскапата околу 35 реали (околу 350 денари). Тие се многу креативни со пиците, има многу вкусови и комбинации.

Каде одат Бразилците на одмор?

Америка, посебно Дизниленд, тоа е сон на секој Бразилец, а и Европа. Имаат многу високо мислење за европските земји.

Навистина ли се толку вљубеници во танцот?

Дефинтивно, тие прво танцуваат, па проодуваат. Сите знаат самба, но има многу различни танцови, и модерни и традиционални.

Бразилците обожаваат музика, постојано се во ритам и движење, а за викенд од секој дом ечи музика, како да се натпреваруваат кој е погласен.

Какво доживување е карневалот во Бразил?

Во Бразил карневалот е поделен. Светот го знае карневалот во Рио кој е познат по самбодромот и школите за самба. Натпреварот е кој има најдобро украсено возило, макети за презентација на школата за самба и најдобра кореографија. Во Рио и во Сао Пауло карневалот е избор на најдобрата школа за самба.

Но, вистинското лудило е пред карневалот кога има забави во паркови и затворени улици со познати артисти. Иако светот го дефинира Рио како епицентар на карневалот, тој има корени во Салвадор. Јас го имам посетено карневалот во Салвадор.

Главната улица покрај плажата е затворена за време на еднонеделниот карневал, се поставуваат барови, а наместо сцени се користат камиони со звучници (trioelektirco) на кои настапуваат најпознатите бразилски ѕвезди. Вистински хаос на улиците, многу луѓе, танц и пиво.

Традиционално карневалот е во средина на февруари и е пеколно топло, но тоа не ги спречува да се забавуваат цели ноќи. Јас не издржав на улица, па отидовме во бар, кој е монтиран само за тој период и има тераса над главната улица од каде се гледа целото карневалско лудило.

За време на карневалот животот како да се става на пауза и сите дишат и се движат во ритамот на самбата. Фабриките и училиштата се затворени и буквално сите е на одмор.

Што би донела од таму во Македонија и од Македонија би однела таму?

Во Македонија би донела малку од бразилскиот дух на безгрижност и забава, и секако нивните зачини кои даваат арома и неодолив вкус на храната. А од Македонија да можам би си ги донела семејството и пријателите, и куфер полн со биено сирење, ајвар и кафе. Иако сум во Бразил, сепак нема подобро од нашето кафе.

Можеш ли да замислиш таму да дочекаш пензија?

Искрено немам размислувано на пензија, но мојот сопруг веќе планира да се пензионира во Охрид.

Уште фотки од Бразил:

• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
•  

©CRNOBELO.com Забрането преземање и копирање. Крадењето на авторски текстови е казниво со закон.

С. С. | Црнобело