Александра Лозановска (50): „Цел живот живеам во Демир Хисар и продавам производи од мојата бавча“

Која е тајната на добриот ајвар?

За ајварот како традиционален специјалитет во Македонија сите го знаат рецептот.

Но, од моето досегашно искуство можам да кажам дека за убав, вкусен и здрав ајвар е најважно од каде потекнуваат пиперките – како се одгледувани, во каква почва се засадени, со каква вода се наводнувани, во кој период се набрани, потоа, како се приготвувани, дали се печени и лупени, како се печени, дали откако ќе се испечат и излупат се цедат, дали се пржат доволно итн. Има многу фактори од коишто зависи убавината и квалитетот на ајварот.

На пример, кога пиперките не се прскаат со хемиски препарати споро растат и споро зреат, па затоа јас ајварот го правам подоцна од останатите коишто купуваат пиперки за негово приготвување.

Кој ви е омилен специјалитет вам?

Секој си има свој омилен специјалитет, еве на пример јас најмногу ја сакам лутенката, сопругот и свекорот се по слатките работи, синот најмногу ги сака зимските салати, ќерката и свекрвата се повеќе по храната што не содржи шеќер, па за нив спремаме слатка, мармалади и компоти без шеќер, а нивно посебно драго јадење им е штавејот и киселицата.

Зошто Демир Хисар не би го замениле за Скопје или за кое било друго место?

Хммм… Па, за секој родното место си има посебно место во срцето, така е и со мене.

Демир Хисар никогаш не би го заменила за друго место поради свежиот и чист воздух, зелените планини, тивките вечери, пријатните луѓе, мирниот живот…

Никогаш не би го заменила и поради слободата којашто ја имаме и поради убавините на природата.

Порака до сите што се отселуваат од малите гратчиња во Македонија…

Отселувањето од малите места во Македонија е многу големо и сите знаеме зошто е тоа така, секој си бара подобри и поубави услови за живеење.

Јас немам порака за тие што се отселуваат бидејќи сум сигурна дека тоа го прават со голема причина, инаку кој е тој што сака да си замине од своето родно место, родно огниште, куќа и од своите најблиски?

И моите деца заминаа од овде за да работат, да имаат подобри услови за живеење и покрај сите убавини што ни ги нуди природата овде.

Ретко кој останува во малите местенца, а уште поретко е да се најде некој што се грижи и заложува за опстанок на ваквите мали местенца.

Повеќе фотографии од малиот рај на Александра во Демир Хисар на следната страна...