Менде Бошевски: „Чувам бурмански питон, долг 2 метри, возрасна змија јаде само 7 - 8 пати годишно“

Детали

четврток, 15 септември 2022

„Многупати сакав да набавам змија, но бев спречен од родителите бидејќи кај нас кога ќе се спомене змија веднаш асоцира на нешто опасно, страшно и смртоносно, но тоа е затоа што за да биде гледана ТВ програмата прикажуваат снимки само како змиите ловат, но во реалноста состојбата со змиите е сосема поинаква…“, раскажува Менде Бошевски од битолско Новаци за CRNOBELO.com.

Менде Бошевски од битолско Новаци, машински техничар по професија, чува змија бурмански питон како миленик.

Вели дека многу одамна е вљубеник во змиите и дека дружбата со нив му претставува задоволство и релаксација.

За својот егзотичен миленик, тој открива за CRNOBELO.com:

Како се одлучи да чуваш змија како домашен миленик? Имаше ли некој член од семејството кој првенствено беше против?

Јас сум зависник од адреналин, a мојот прв контакт со змија беше во Охрид. Таму првпат се сретнав со змија каде и се фотографирав, а тоа беше околу 1997/1998 година.

Почувствував страв и адреналин, а тоа чувство како да ме ослободуваше од напнатост и секој пат кога сум напнат или нервозен времето минато со змија ме релаксира.

Многупати сакав да набавам змија, но бев спречен од родителите бидејќи кај нас кога ќе се спомене змија веднаш асоцира на нешто опасно, страшно и смртоносно, но тоа е затоа што за да биде гледана ТВ програмата прикажуваат снимки само како змиите ловат, но во реалноста состојбата со змиите е сосема поинаква.

Сега, на мајка ми ѝ се интересни боите на змиите, но сè уште не се одлучила да биде во близок контакт со нив.

Татко ми сака да гледа како ги хранам и ми помага во пронаоѓањето храна, но исто така не сака да биде во поблизок контакт со нив.

Единствено син ми се интересира за нив повеќе и се надевам дека еден ден во животот ќе одгледува змии.

Чував најмногу мислам дека беа 12 змии наеднаш, и тоа различни видови на питони ball, burmese, carpet, blood како и боа констриктор или во превод царски удав.

Моментално одгледувам бурмански питон, женка стара 2 години со околу 2 метра должина.

Тоа е еден од 6-те најголеми видови на змии со просечна должина од 5.5 метри, но е регистриран примерок и до 8.2 метри и 183 килограми.

Како реагираат луѓето на твоите миленици?

Луѓето ме осудуваат, некои се плашат да дојдат на гости, но многумина од нив по првата средба со змија го победиле стравот и веќе знаат дека не е тоа што го очекувале.

Нема гаранција дека нема да бидете нападнати од змија, но според мене поголеми се шансите да ве касне куче.

Змиите, одгледани во заробеништво, имаат посмирен карактер и се навикнуваат на држење во раце, па заради тоа се избегнува хранење од рака.

Таа треба да знае кога е време за храна, а кога е време за ракување и затоа мора да ја извадите од терариумот и да ја храните на друго место.

Какви услови се потребни за да чуваш змија? Какви навики имаат, кога спијат?

Змијата не бара голем простор, нема големи потреби кога станува збор за чувањето, односно потребна им е само вода и топлина.

Зависно од староста, младите змии се хранат секоја недела, па на 2 недели, а после тоа возрасна змија јаде само 7-8 пати годишно. Мојата змија има две години и уште е многу млада, па се храни на 7 до 10 дена.

Пленот го убиваат со давење. Најчесто чека во заседа.

Многу ретко сум ја видел да спие и тоа било најчесто по хранење.

Како им изгледа живеалиштето?

На змијата не ѝ е потребна светлина, па живеалиштето може да биде стаклен, дрвен или пластичен терариум.

На долната страна се поставува обична земја или струготини од дрво, пелети или хартија.

Еднаш месечно ја менувам таканаречената „постела“, а секој втор ден ѝ менувам вода за да биде свежа.

Продолжува на следната страна...