Успешни Македонци низ светот: Стефанија од Скопје е балерина, која живее во Русија и игра главни улоги во култен театар (фото)

Детали

среда, 28 септември 2022

„Да се почне првиот работен ден со подготвување на главната улога во „Лебедово езеро“ во престижниот руски театар во Перм е нешто кое мислам дека не се случило на ниедна балерина, но ете ми се случи мене. Беше потребно премногу работа, откажувања и борба, но од овој аспект гледано секоја солза и плускавец, секоја повреда и осаменост (во многу моменти) вредеше.Премногу сум горда на себе на тоа каде успеав да стигнам..“, раскажува Стефанија Гаштарска (21) за CRNOBELO.com.

Стефанија Гаштарска на само 18 години стана првата македонска балерина дел од престижниот руски театар „Бољшој“, но за жал поради короната процесот се искомплицира, па сега, на 21 година, веќе има одиграни 7 главни улоги во претставите од репертоарот на престижниот руски театар „Пермска Опера и Балет“ и тоа Лебедово езеро, Корсар, Бајадерка, Оревокршачка, Жизел, и други …

Моментално живее и работи во рускиот град Перм и тоа во еден од најстарите театри. Перм е град каде има врвна балетска школа и град за кој вели дека ѝ бил прва отворена врата кон Русија, па е посебно емотивно врзана за него.

Стефанија за CRNOBELO.com ја споделува својата приказна:

„Во рускиот град Перм ја добив шансата да настапувам на најпрестижниот балетски натпревар „Арабеск“, каде влегов во финалето и бев најмладиот учесник и со тоа и ја добив поканата да учам таму. Така почна мојата приказна со Русија.

Следно, беше стипендија од Бољшој Академијата каде дипломирав со највисоки оценки во руски клас, но ковид ситуацијата го искомплицира моето вработување од причина што година и половина границите беа затворени и тоа секако беше најтешката година во мојот живот, но во моментот кога ги пуштија летовите јас веќе бев на пат кон Русија.

Планот беше Бољшој театарот, но кога ја добив понудата од Перм, без размислување прифатив.

Да се почне првиот работен ден со подготвување на главната улога во „Лебедово езеро“ е нешто кое мислам дека не се случило на ниедна балерина, но ете ми се случи мене.

Ми се оствари најголемата желба, кариерата, поточно првиот работен ангажман да го започнам со една од најголемите улоги од железниот репертоар – да бидам белиот и црниот лебед.

Русија е земја која е колевка на балетската уметност и за мене секогаш била сон. Пресреќна сум што толку млада ја имам таа привилегија да го живеам сонот.

Продолжува на следната страна...