За оние кои не сакаат море: 5 езера во Србија за вистинско уживање во природа

Детали

петок, 14 јули 2023

Некои од овие езера во Србија се убаво средени и урбанизирани, а други и понатаму се „диви“, па ќе можете да уживате во недопрената природа.

Сигурно многупати досега сте биле на Охридско, Преспанско и Дојранско Езеро, но веруваме дека веќе сакате да откриете нешто ново и поинакво. Зошто не посетите некое од езерата во соседна Србија?

Блиску се, до нив се стигнува лесно, а имаат прекрасна природа.

Некои од овие езера се убаво средени и урбанизирани, а други и понатаму се „диви“, па ќе можете да уживате во недопрената природа.

Колку и да се атрактивни, во некои од нив не е дозволено капење, па посетителите мора да ги почитуваат правилата кои се поставени од локалните власти.

Дел од езерата во Србија, совршени за да ги посетите:

Палиќко Езеро

Во близина на Суботица и границата со Унгарија се наоѓа оваа природна оаза. Покрај езерото, има убаво уредени патеки кои се наменети за пешаците и за велосипедистите.

Веднаш до езерото се наоѓа и Зоолошката градина, која е една од најпознатите во Србија.

Белоцрквенски Езера

Во недопрената природа на Србија се наоѓаат и Белоцрквенските езера. Ова е комплекс од 7 вештачки езера во Банат, а настанале поради експлоатацијата на песокот од дното на Панонскиот базен на почетокот на 20-тиот век.

Тие се едно од омилените места на рибарите, но покрај самото езеро има многу ресторани, кафулиња и паркови, кои нудат можност за забава и уживање за сите.

Власинско Езеро

Освен по свежиот воздух и недопрената природа, Власинско Езеро е познато и по островите кои лебдат во самото езеро и се движат под влијание на струите и ветерот.

Езерото се наоѓа на надморска висина од 1.200m, во близина на градот Владичин Хан.

Сребрено Езеро

Езерото се наоѓа во близина на Велико Градиште и е едно од омилените места излетнички места во овој дел од Србија.

Околу езерото има убаво уредени патеки, кои нудат можност за пешачење, возење велосипед и други спортски активности.

Борско Езеро

Борско Езеро се наоѓа на надморска висина од 438m. Настанало во втората половина на минатиот век, од планинските реки од Црн Врв.

Водата е исклучително чиста, бистра и студена. Но, тоа не им пречи на луѓето од околните места да го посетуваат во текот на летото.

А. Ј. | Црнобело