Учителка од Србија не сака подарок за 8 Март: „Донирајте ги парите, јас имам сè“

Детали

среда, 06 март 2024

Лела, учителка од Србија, ги освои симпатиите во регионот, откако побара од родителите да не ѝ купуваат подароци за 8 Март, туку парите што би ги собрале да ги уплатат за лекување на една мајка.

Купувањето подароци за учителките за 8 Март е традиција која трае со децении. Родителите сами, или во договор со другите родители од одделението, се организираат за купување цвеќе и подароци за жените кои се грижат за образованието на нивните деца.

Па, додека едни купуваат скромни подароци, има и такви кои собираат прилично висока сума пари за да им подарат на учителките нешто големо и скапо.

Но, Лела, учителка од Србија, ги освои симпатиите во регионот, откако побара од родителите да не се трошат за подароци, туку парите што би ги собрале да ги уплатат за лекување на Ивана од Пејовци.

Пораката што учителката Лела ја испратила до родителите се споделува на Твитер.

„Добар ден. Знам дека е актуелна еуфоријата околу Денот на жената. Така е и кај моите деца во градинка и на училиште.

Во оваа пригода би ве замолила парите наменети за подарок да ги уплатите на сметката на Ивана од Пејовци.

Јас имам сè. Не постои подарок кој ми е потребен, колку што неа и на нејзиното дете им е потребно таа да оздрави.

Јас вашите деца и својата работа ги сакам и без подароци. Ништо нема да ја смени мојата работа. Уште еднаш би ве замолила тоа да ѝ го подарите на Ивана“, стои во порака на учителката.

Ова предизвика воодушевување во регионот.

„Има надеж додека постојат скромни, ведри и воспитани луѓе“, стои во коментарите.

А. Ј. | Црнобело