Ведрана Рудан објави дека боледува од рак: „Животот е убав и кога смртта ќе ти тропне на врата“

Детали

вторник, 07 мај 2024

„Денес престанувам да пишувам на блогот, затоа што ќе се посветам на лекувањето и ќе напишам книга за тоа. За жал не можам да ви кажам дека ќе умрам, но сигурна сум дека постојат шанси за тоа“ – пишува Ведрана Рудан во својот последен текст во кој објави дека боледува од рак.

Хрватската писателка Ведрана Рудан, во свој стил, преку текст на својот блог, соопшти дека боледува од рак.

Во текстот насловен „Ракот и јас“, Ведрана се осврна на тоа како ѝ соопштиле дека боледува од кобната болест, каква била нејзината реакција, но и за тоа какви се реакциите од најблиските, од пријателите, од лекарите…

„Илјадници пати го замислував овој миг. Писателите имаат бујна фантазија, како ќе изгледа тоа кога лекарот ќе ви пријде и без насмевка на лицето ќе ви каже…

Дали ќе паднам во несвест? Ќе се избезумам ли? Ќе плачам ли? Ќе се прашувам ли: ’зошто јас‘?

Животниот век се продолжи, јас сум млада… Не, не, не, зошто јас? Ништо не сум преживеала. Ме фати смеа кога ги видов загрижените лекари, како само се насобраа околу мене. Почувствував дека сакаа да ми ја олеснат маката што не ја чувствував.

Јас сум во 75-тата година од животот, голем број мои врсници немаат рак. Здрави се, во полна форма, а јас, а јас… Дури и не верувам дека треба да мислиш на добро за сè да биде добро, не се заморувам со тоа“ – пишува Ведрана.

Како што вели Ведрана, оваа дијагноза ѝ помогнала да сфати колку многу вистински пријатели има, па дури и најдобрата пријателка ѝ ветила дека нејзината пепел ќе ја разнесе на омилената плажа (иако тоа е забрането).

„Денес престанувам да пишувам на блогот, затоа што ќе се посветам на лекувањето и ќе напишам книга за тоа. Кога авторот на книги пишува за фазите на своето умирање тоа се чита како лудо.

Додуша тие книги имаат смисла кога авторот или авторката ќе почине, а сè друго не е напнато. За жал не можам да ви кажам дека ќе умрам, но сигурна сум дека постојат шанси за тоа“ – продолжува писателката.

Таа пишува дека во моментов поминува третмани со зрачење, а за крај упати порака до нејзините обожаватели.

„Немојте да ме жалите. Смртта или близината на смртта е посебно доживување. Опушта. Ти зборува што е важно и ти порачува дека животот е убав и навистина е убав кога смртта ќе ти тропне на вратата.

Нека тропа, сè уште сум овде и уживам во животот како никогаш“ – вели таа.

Прочитајте и Ведрана Рудан со критики до модерните мајки: „Се сликаат со голи задници, а децата ги третираат како мајмуни во циркус“

Б. С. Б. | Црнобело