Запросување во Грција се претвори во трагедија: Туристка изгубила свест поради мозочно крвавење, откако кажала „да“

Детали

понеделник, 07 јули 2025

25-годишен дечко од Чешка решил да ја запроси својата девојка во црква во близина на Лефкада. Но, откако кажала „да“, девојката изгубила свест и моментално е на интензивна нега во критична состојба.

Одморот во Грција на млад чешки пар се претворил во хорор откако дечкото ја запросил девојката, но таа завршила во болница.

Според неколку грчки медиуми, дечкото и девојката, на возраст од 25 и 24 години, биле на одмор во Лефкада.

Во саботата (05.07), тие отишле во црква во близина на Лефкада, каде дечкото сакал да ја изненади саканата со запросување.

Според очевидците, тој клекнал на колено и ја побарал за жена, а девојката радосно го прифатила прстенот. Но, неколку секунди подоцна паднала на земја, без свест.

Исплашен, дечкото почнал да вика помош, по што веднаш дошла брза помош и девојката била пренесена во болница во Лефкада.

По прегледот лекарите утврдиле дека 24-годишната девојка има крвавење во мозокот и дека е во критична состојба.

Девојката веднаш била пренесена на интензивна нега во болница во грчкиот град Јанина и според досегашните информации, уште се наоѓа таму.

Идентитетот на младиот пар не е познат за јавност, со цел да се заштити нивната приватност и не е познато дали девојката претходно имала некои здравствени проблеми.

Грчките медиуми пренесуваат дека дечкото уште бил во шок и неверување бидејќи одморот од соништата им се претворил во кошмар.

Спирова С. | Црнобело