Трагедија на хрватскиот остров Раб: 1-годишно девојче паднало од тобоган – таткото се спуштал со неа држејќи ја во раце

Детали

петок, 25 јули 2025

Татко кој се спуштал на тобоган со неговата ќерка на возраст од 21 месец, случајно ја испуштил, па девојчето паднало од голема височина. Веднаш било пренесено во болница со хеликоптер, но следното утро подлегнало на повредите.

Летувањето на семејство од Германија завршило со трагедија откако нивната 21-месечна ќерка паднала од тобоган и подлегнала на повредите.

Како што пренесуваат хрватските медиуми, несреќата се случила на островот Раб во аквапаркот Aquagan, а детето паднало од рацете на својот татко.

Таткото се спуштал на тобоганот со девојчето во раце, но во еден миг му се испуштило, па паднало од голема висина на земјата.

Инцидентот се случил во вторникот (22.07) и детето веднаш било пренесено во болница со хеликоптер. Но, следното утро починало.

Трагедијата се случила пред очите на бројни посетители, а според некои очевидци, таткото во паника повикал брза помош и само рекол:

„Не ме прашувајте ништо, ќерка ми умира!“

За хрватските медиуми, се огласи докторка од болницата каде што било примено девојчето.

„За жал, детето имаше повеќекратни тешки телесни повреди, вклучувајќи сериозни повреди на главата, мозокот и градниот кош.

И покрај сите мерки за интензивно лекување, во утринските часови дојде до смртен исход. Искрено се сочувствуваме со семејството во овој тежок момент“.

Кратка изјава даде и управителот на аквапаркот:

„Не бев таму кога се случи трагедијата и што да ви кажам… Ова е трагедија за нас, за семејство, за сите. Полицијата е сега во паркот и проверува што се случило.

Во овој парк, со кој управувам повеќе од 30 години, никогаш не се случило нешто вакво“.

Безбедности мерки за тобогани варираат од парк до парк, а зависат и од висината на тобоганот. Постојат тобогани наменети само за возрасни поради потенцијална опасност што ја претставуваат.

Генерално, во повеќето аквапаркови, задолжително е децата на возраст под шест години (некаде и 12) да бидат под постојан надзор на возрасна личност.

За некои тобогани, пак, децата треба да имаат одредена висина за да можат да ги користат.

Кај повеќето аквапаркови, децата треба да се високи најмалку 90 сантиметри не само за тобоган, туку и за останатите реквизити во паркот.

Кога се во прашање многу мали деца кои немаат ни две години, тобоганите не се сметаат за безбедни, без разлика што се во придружба со возрасна личност.

Причината е тоа што телото треба да биде поставено во одредена положба за спуштањето со тобоганот да биде безбедно, а многу малите деца не се способни да ги следат овие инструкции.

Засега нема информации какви биле мерките за безбедност во аквапаркот во Хрватска каде што се случи трагедијата.

Спирова С. | Црнобело

фото: Фејсбук