Ја пречекаа како хероина во Бугарија, претходно ја исмејувале, сопругот ѝ бил поддршка – Сè за Дара, победничката на Евровизија 2026

Која е Дара?

Нејзиното вистинско име е Дарина Николајева Јотова, а родена е во Варна во 1998 година.

27-годишната победничка се занимава со музика уште од најмлада возраст, на 7 години учела фолклорно пеење, но подоцна се одлучила за помодерен поп звук, иако често нејзин заштитен знак е токму мешањето на двата жанра.

Првата поголема популарност ја стекнала во 2015-та, кога како 17-годишна девојка освоила трето место на бугарскиот X-Factor.

Токму тогаш почнува нејзината професионална музичка кариера, кога потпишала договор со издавачката куќа Virginia Records, а оттогаш почнала да го користи и прекарот Дара како уметничко име.

Во досегашната кариера има објавено два албума, има учествувано и во бугарската верзија на „Твоето лице звучи познато“, а во 2021 станала и вокален тренер во музичкото шоу „Гласот на Бугарија“, каде од вкупно четири сезони, дури две години своите учесници ги донела до победа.

Песната Bangaranga, според Дара е поп песна со фолклорна срж, a се фокусира на ослободување на сопствената личност, прифаќање на своите страни и славење на внатрешниот бунт.

Што значи Bangaranga?

Значењето на зборот Bangaranga, многумина пишуваа дека потекнува од јамајканскиот збор „Bangarang“ што означува неред, хаос или бунт, а во песната е прилагоден во „Bangaranga“, со што станува симбол за силни, самосвесни и бунтовни жени кои го контролираат својот хаос.

Дара пак, во Инстаграм објава, објасни:

„Инспирирано од кукери – антички бугарски ритуал во кој изведувачи го бркаат злото – Бангаранга се бори со модерните демони во нас.

Бангаранга е моментот кога ја одбираш љубовта наместо стравот. Кога ќе се искачиш на повисоко енергетско ниво и ќе отидеш чекор напред – посилен од анксиозноста, сомнежите, срамот и внатрешниот хаос.

Не напаѓа, туку трансформира. Бангаранга не е нешто што стануваш, туку нешто што го будиш во себе.

Па кога и да стане страшен животот, не се грижи, биди Бангаранга“.

На Евровизија, Бугарката Дара, за Bangaranga рече:

„Bangaranga е чувство дека сè е возможно. Се борев со анксиозност и една работа што ми помогна е разговорот со себе, во кој се прашував што е вредно, што е мојата вредност?

И дознав дека да бидеш тоа што си и да останеш автентичен на тоа е најмоќната работа, и да бидеш храбар, да го одбереш својот стил е прекрасно.

Не го правам за нечие одобрување, туку затоа што тоа сум јас“.

Што се однесува до љубовниот живот, од јуни 2025, Дара е во брак со нејзиниот избраник од Турција, Ервин.

М. М. | Црнобело