Една од најубавите Турчинки ја глуми Македонката заљубена во „забранет“ дечко – кои се актерите од турската серија што се снима во Скопје?

Детали

петок, 27 мај 2022

Во турската серија Balkan Innisi, улогата на Јованка, убавата Македонка која се вљубува во дечко од другата страна на Вардар и нивната љубов е забранета, ќе ја толкува една од најубавите Турчинки. Кои други актери ќе ги видиме во новата серија што се снима во Скопје и кога ќе се емитува?

Од септември, на турската телевизија ТРТ 1 треба да почне да се емитува новата турска серија Balkan Ninnisi што деновиве почна да се снима на повеќе локации во Скопје.

Публиката во Турција и во Македонија со нетрпение ја очекува приказната за забранетата љубов меѓу дечко и девојка од двете страни на Вардар, која во текот на ова лето ќе биде целосно снимена во Македонија.

За време на снимањето на првите сцени, најголемо внимание привлече појавата на турскиот актер Ердал Озјагџилар, кој на македонската публика ѝ е добро познат по улогата на Рамиз, во серијата „Збогум Румелија“ и „Зет Домазет“.

Ова не е првпат Ердал да снима во Македонија. За потсетување, серијата „Збогум Румелија“ беше снимена на локации во Битола, Охрид и мариовските села, а токму заради тоа и заради единствената приказна привлече големо внимание и кај македонската публика.

Улогата на девојката Јованка, во серијата ќе ја толкува Мерих Озтурк (22), познат турски модел и актерка. Таа во 2018-та година ја добила наградата за најдобар модел во Турција.

Мерих досега играла во повеќе турски серии, а на Инстаграм сподели фотографии од аеродормот во Истанбул, до кои напиша:

„Добри вести. На пат сум до Balkan Ninnisi. Се гледаме во Македонија. Јованка, не можам да дочекам да те оживеам.“

Улогата на дечкото во серијата ја толкува турскиот актер Емре Беј (24). Младиот актер е познат кај турската публика по улогите во повеќе познати турски серии, а внимание привлекува како со талентот за глума, така и со добриот изглед.

Меѓу другите попознати актери е и Хакан Бојав кој играше во повеќе турски серии што се емитуваа и во Македонија, „Долина на волците“, „Девојката од чифликот“, „Имотот на дамата“, итн.

Тој во серијата ќе го игра таткото на Јована, а на Инстаграм сподели селфи фотографија направена на плоштадот „Македонија“ во Скопје.

Б. С. Б. | Црнобело