Верувања поврзани за „Благовец“ - Црковен празник за мајката, ден кога на децата им се ставаат обетки

Детали

петок, 07 април 2023

Според црковните објаснувања, Благовештение е почеток на сите Господови празници и означува „добра вест“ или „блага вест“. Кои верувања и традиции се поврзани со овој христијански празник?

Благовештение, или кај народот познат како „Благовец“, е христијански празник од пролетниот циклус што секогаш се слави на 7-ми април.

Денес именден слават оние што го носат името Благоја, Блаже, Благица...

Според црковните објаснувања, Благовештение е почеток на сите Господови празници и означува „добра вест“, „блага вест“, известување за најголемата и најрадосната вест во историјата на човештвото за спасението на човечкиот род, коешто се изврши преку Восплотувањето на Синот Божји во утробата на Дева Марија.

„Празникот Благовештение е воедно и Господов и Богородичен. Господов бидејќи се однесува на Христа Господа, Којшто беше зачнат во утробата на Богородица, а Богородичен бидејќи се однесува на онаа личност којашто придонесе во зачнувањето и вочовечувањето на Бога Словото“ – пишува на веб-сајтот на Бигорски манастир, во појаснувањето за празникот.

Оттука, сосема е јасно зошто Благовештение, односно Благовец, кај народот се слави и како ден на мајката, кога треба да ѝ се искаже почит и љубов на жената што ни подарила живот, а за неговата „блажина“ се врзуваат голем број верувања.

Се смета дека на овој ден се враќаат сите птици преселници, па дури и кога времето не е убаво, надвор ќе видите ластовичка, штрк или славеј.

Старите веруваат дека на овој ден, ако наутро ве разбуди звукот од некоја од птиците преселници, ќе имате голем напредок во годината.

Истовремено, се верува дека тиквите и зеленчукот што ќе бидат засадени на денешен ден ќе бидат многу благи.

За Благовец се врзува уште една традиција што е многу популарна во голем број македонски градови - на овој празник, на малите девојчиња најчесто им се дупнуваат ушињата и им се ставаат обетки.

Се верува дека денот е благ, па затоа ниту раната од дупнувањето нема да боли, а ушињата ќе заздрават брзо и без проблеми.

На овој ден, според верувањата, треба да се помолат и мајките што посакуваат да имаат деца и Господ ќе им ја исполни желбата.

Ова е ден кога именден слават луѓето што ги носат имињата: Благоја, Блаже, Благојка, Благица итн.

Б. С. Б. | Црнобело