Тоа што ќе правите денес, ќе ве следи цела година - Народни обичаи и верувања за Св. Игнат кај нас

Детали

петок, 02 јануари 2026

Сигурно сте слушнале за народното верување дека тоа што ќе го правите на 2 јануари, ќе го правите во текот на целата година, но и дека од тој што ќе ви влезе прв во домот зависи каква среќа ќе имате . Кои се вашите планови за денешниот ден?

Св. Игнат се празнува низ цела Македонија, а скоро секој регион има свои верувања, обичаи и суеверија поврзани со денот.

Но, заедничко за сите е верувањето дека како ќе ви тргне денешниот ден, таква ќе ви биде и годината.

Меѓу народот постои верување дека ако домашниот праг прв го помине некој млад, насмеан, среќен таква ќе биде и годината што почнува, а ако ви влезе старец, тогаш деновите ќе ви бидат потешки.

Многумина денес одат на патување за да патуваат цела година, други, пак, не трошат пари за да немаат непотребни трошоци во текот на следните 12 месеци.

Св. Игнат секогаш е пет дена пред Божиќ и со него започнуваат свеченостите поврзани со овој празник.

Кои се обичаите, верувањата и суеверијата кај нас?

Во велешко на 2 јануари се варат пченица и царевка (пченка) заедно за да се зголеми бериќетот.

Во Гевгелија и околината на овој ден не работеле жените што имале деца.

Во штипско празникот го викале Игнат-подигнат, па на тој ден мајките ги тегнеле своите деца за ушите или за главата, за да растат повеќе.

Во Радовиш, Св. Игнат се сметал за тежок празник, па денот го минувале во тишина, не се пеело, не се викало, дури и децата не се тепале за да не плачат гласно.

Во Охрид на пример, се правеле посни питулици од тенка каша, печени во специјални садови и после се попарувале со врела вода со толчени ореви. Со дел од водата се правеле крстови на оџаците, горните прагови на куќните врати, амбарите, бочвите за бериќет и плодна година.

Во тетовско на овој ден луѓето не практикувале ништо да позајмуваат. Се случувало постарите да ги заклучуваат вратите од своите домови за да не им влезат лоши луѓе и лошо да им тргне годината.

Во скопско се кршеле гранчиња од зеленика, смрека и даб и со нив се потпалувал оган, како благослов за семејството, земјата и стоката.

А. Ј. | Црнобело