Романтично запросување на Македонка во замокот Шенбрун во Виена, со ливчиња од рози и балони (фото)

Детали

понеделник, 08 мај 2023

„Движејќи се сѐ поблизу до нашите пријатели, од далечината забележав разлетани ливчиња рози, романтична музика, балони и мојот партнер кој стоеше чекајќи ме со свеж букет во рацете. Во тој момент, кога го постави прашањето, без двоумење го изговорив најгласното да“, вели Цветанка Стефанова за CRNOBELO.com.

Цветанка Стефанова и Слободан Прочков се свршија пред еден месец во замокот Шенбрун во Виена, по 4 години врска.

Цветанка е апсолвент на Институтот за филозофија и во моментов го подготвува дипломскиот труд, а Слободан е дипломиран визуелен уметник.

За CRNOBELO.com, Цветанка раскажа за романтичното изненадување што ѝ го подготвил Слободан заедно со нивните пријатели:

„Сѐ се случи на 7-ми април, кога со Слободан бевме на посета кај нашите пријатели кои долго време живеат во Австрија. Заедно со мојот сакан, тие успеале вешто да направат план во рок од три дена.

На Слободан, кој е визуелен уметник, креативноста и романтиката му се јака страна.

Јас и мојот партнер споделуваме пријателство од 10 години, а имаме врска скоро 4 години. Нормално, претчувствував дека тој ден имаше трема, но си помислив дека тоа веројатно е од умор или jet lag. 

Кога ги истражувавме убавините на палатата Шенбрун, дел од моите пријатели ме насочија кон местото за фотографирање, а другиот дел од нив скршнаа на другата страна од палатата, без да знам дека тие веќе почнале да го спремаат изненадувањето.

Движејќи се сѐ поблизу до нашите пријатели, од далечината забележав разлетани ливчиња рози, романтична музика, балони и мојот партнер кој стоеше чекајќи ме со свеж букет во рацете.

Во тој момент, кога тој го постави прашањето, без двоумење го изговорив најгласното да. 

Изборот на мојот партнер за оваа дестинација беше поради прекрасната глетка, но воедно и интересните историски факти коишто ја потврдуваат убавината и уникатноста на оваа палата“.

Повеќе фотки од романтичното запросување:

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело