Славчо Попоски, метеоролог: „Нè очекува влажно и нестабилно лето, со многу непогоди, поплави и штети“

Детали

вторник, 13 јуни 2023

„Феноменот 'Ел Нињо' ќе донесе многу влажно и нестабилно време, со многу временски непогоди. Топлотните бранови ќе бидат пократки ова лето, но сепак нормално дека ќе ги има. Сè на сè, во иднина да се навикнеме на временски непогоди и поплави“, открива метеорологот Славчо Попоски за CRNOBELO.com.

Сите можеме да се согласиме дека досега не сме виделе толку врнежлив јуни како годинава. Температурите беа релативно ниски во текот на целата пролет, а според експертите истото можеме да го очекуваме и во текот на летото.

Македонскиот метеоролог Славчо Попоски за CRNOBELO.com открива какви временски услови можеме да очекуваме до крајот на оваа седмица, но и во текот на целото лето.

Според него, веќе треба да се навикнеме на нестабилното време кое ќе се чувствува низ цела Европа.

Еден од главните „виновници“ за нестабилното време е феноменот познат како „Ел Нињо“. Ова е всушност зголемување на температурата на водата во Тихиот Океан кое има влијание врз климата во целиот свет.

Феноменот обично се јавува на секои две до седум години и генерално трае од девет месеци до една година.

Појавата на феноменот може да има влијание врз климата на целата планета.

Прогнозата на Славчо Попоски:

„Оваа година ќе го одбележи потоплиот феномен 'Ел Нињо'. Овој феномен во цела југоисточна Европа ќе донесе многу влажно и нестабилно лето, и со многу временски непогоди, поплави и штети, и тоа веќе и како го чувствуваме.

Топлотните бранови ќе бидат пократки ова лето, но сепак нормално дека ќе ги има.

Сè на сè, во иднина да се навикнеме на временски непогоди и поплави.

Под влијание на циклонот од Средоземјето, сè до крајот на оваа седмица времето во Македонија ќе биде многу нестабилно и со честа појава на пороен дожд, грмежи и засилен ветер.

Локално ќе има појава на изразено невреме, проследено со интензивен пороен дожд, големо количество на воден талог за кратко време, силен ветер, електрични празнења и појава на град.

Токму поради ова, граѓаните треба да бидат крајно претпазливи, како и да не престојуваат на отворен простор и под осамени дрвја во случај на појава на електрични празнења.

Дури е можно и излевање на некои од реките низ Македонија, особено оние помалите.

Локално до самиот крај на оваа седмица ќе наврне големо количество на воден талог (над 60/70 л/м2). Постои опасност од нови локални и големи поројни поплави и штети.

Во скопскиот регион исто така ќе има честа појава на пороен дожд, грмежи и засилен ветер. Во делови од котлината исто така е можна појава на невреме и поплавувања.

Температурите на воздухот нема многу да се менуваат и речиси насекаде ќе бидат над 20 степени, а во најтоплите централни и југоисточни предели тие повремено ќе достигнуваат и до 28 степени“.

©CRNOBELO.com Забрането преземање и копирање. Крадењето на авторски текстови е казниво со закон.

Спирова С. | Црнобело

фото: Фејсбук, depositphotos.com