Метеорскиот дожд „Персеиди“ ќе биде видлив и во Македонија – Што треба да направите за да можете да уживате во глетката?

Детали

вторник, 08 август 2023

Вечерта помеѓу 12-ти и 13-ти август се очекува да можат да се видат и по 100 метеори во еден час. Тоа би била идеална причина да заминете некаде во планина и да уживате во глетката на небото.

Како и секоја година, така и оваа од Земјата ќе биде видлив познатиот метеорски дожд познат како „Персеиди“.

Иако меторскиот дожд е видлив секоја година во периодот од јули до средината на август, годинава пикот ќе биде вечерта помеѓу 12-ти и 13-ти август, кога ќе може да се забележат и по 100 метеори во еден час.

Метеорскиот дожд ќе биде највидлив на Северната хемисфера на земјината топка, но благодарение на поволните услови се очекува небесната појава да биде видлива од која било точка на земјината топка.

За разлика од минатата година, кога Месечината беше премногу светла, па метеорскиот дожд не можеше да се види, годинава само 10 отсто од природниот сателит ќе бидат видливи, па се очекува дека метеорите ќе бидат позабележителни со голо око.

За да го набљудувате дождот од метеори потребно е да најдете темно место, каде светлосната „загаденост“ на околината е на минимално ниво.

Легнете на грб и опуштете се и почекајте 30-тина минути за очите да ви се навикнат на темнината.

Најдобар период за набљудување на метеорите е во часовите пред зори, а потребно е да погледнете на северниот дел на небото.

Метеорите можете да ги набљудувате со голо око и нема да ви биде потребен телескоп или друга дополнителна опрема.

Б. С. Б. | Црнобело