Тина од Скопје со трогателна објава: „Бев дете, стоев на балконот од нашиот стан на Рекорд и ја гледав тезгата на чичко Драги“

Детали

вторник, 17 октомври 2023

„Бев дете, 3 години, стоев на балконот од нашиот стан на Рекорд и секогаш вниманието ми го привлекуваше тезгата на чичко Драги. Кога ќе дојдеше сонцето до неа сите ланчиња светкаа. Пред некоја година тој имаше операција и повеќе не може да зборува. Се разбираме со ливчиња. Сега ме замоли да му помогнеме, што за него храна, што за кучињата или купете нешто од неговата тезга“, напиша Тина Алексовска.

Пејачката Тина Алексовска, која живее во строгиот центар на Скопје, во Фејсбук групата „Стари скопјани“ ја раскажа приказната за чичко Драги, човекот кого го познава од дете, а кој долги години има тезга на Рекорд и продава разни дребулии за да преживее.

Тина објави неколку фотки од чичко Драги и побара помош од хуманите луѓе да му помогнат на старецот, или со храна за него и за кучињата за кои се грижи, или да купат нешто од неговата тезга.

Нејзината објава стана вирална и ја споделија многу луѓе, со надеж дека чичко Драги ќе добие помош.

Објавата на Тина гласи:

„Бев дете, 3 години, стоев на балконот од нашиот стан на Рекорд и секогаш вниманието ми го земаше тезгата на чичко Драги која беше во пролазот каде што е сега Министерство за правда.

Кога ќе дојдеше сонцето до тезгата сите ланчиња светкаа.

Во тоа време чичко Драги продаваше многу убави работи.

Годините си поминуваа, тој остана на Рекорд.

Имаше денови кога трчав да видам дали му е добро.

Пред некоја година, во најголемиот снег, ми кажаа дека е на операција на Одделот за уво, нос и грло, па зедов такси и го побарав.

Налетав на доктор кој го познавам и ми тој ја покажа собата на Драги. Па, тој кога ме виде, почна да плаче, почна да ми покажува со раце дека го оперирале и дека повеќе не може да зборува.

Поминуваа годините, со ливчиња се разбиравме, ми пишуваше што му треба.

Денес, поминав да го видам, бидејќи си заминувам за Германија.

Ме замоли да му помогнете, што за него помека храна, што за кучињата или купете нешто од неговата тезга.

Секој ден е на Рекорд до 12:00 часот“, напиша Тина.

Нејзината порака доби големо внимание, па многу пријатели на Тина ѝ напишаа дека ќе ја посетат неговата тезга и ќе му однесат храна, а други прашаа дали има сметка на која можат да уплатат пари.

„Баш минатата недела бев кај него, оставив донација за куќињата и си купив нешто. Многу добар човек со огромно срце. Си правевме и муабет 30 минути, на ливчиња ми пишуваше.

Се надевам ќе успееме да ја рашириме заедно сите приказната за чичко Драги и да помогнеме“, стои во еден од коментарите.

Прочитајте и Тина Алексовска по операцијата на отворено срце: „Заради резот на телото, мислев никој веќе нема да ме сака - по 8 месеци го запознав сопругот“

А. Ј. | Црнобело