Грст радост за 250 дечиња - Мотоциклистот Христијан Бузалковски донира пакетчиња за деца од ранливите семејства

Детали

недела, 31 декември 2023

„Акцијата ја правам 3-та година по ред, а првпат со Отец Методија од црквата Св. Петар и Павле. Успеавме да собереме преку 250 пакетчиња и навистина многу се израдував кога слушнав дека ќе израдуваме толку многу деца“, вели Христијан Бузалковски, трикратниот европски шампион.

Христијан Бузалковски, македонскиот мотоциклист и трикратен европски шампион во БМУ категорија, трета година по ред, пред новогодишните празници организира хуманитарна акција во која собира донации – пакетчиња за децата од најранливите семејства.

Откако преку својот Инстаграм ги повика сите што сакаат да донираат за децата, тој успеа да собере 250 пакетчиња, кои ќе им донесат радост на 250 деца.

За CRNOBELO.com, Христијан откри дека и самиот е изненаден од бројот на донации, но и пресреќен што толку многу деца ќе добијат барем по едно пакетче.

А, тоа, вели, му е поттик, и в година да продолжи со идејата што ја започна во 2021-ва.

„Оваа година во организација со Отец Методија од црквата Св. Петар и Павле во Скопје, во склоп на хуманитарната организација „Св. Спас“, започнавме новогодишна акција со цел да се соберат што е можно поголем број пакетчиња за да се израдуваат повеќе дечиња.

Акцијата ја правам трета година по ред, а оваа година првпат со Отец Методија.

Заедно успеавме да собереме повеќе од 250 пакетчиња.

Дел од пакетчињата ми ги доставија, а оние што не можеа да ги донесат, одев да ги земам јас откај нив. Сите останати донираа кај отецот директно во црквата.

И навистина многу се израдував кога слушнав дека сме собрале толкав број.

Се надевам дека следната година ќе успееме да собереме уште повеќе сè со една цел - да создадеме уште повеќе детски насмевки“, вели Христијан.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело / фото: Приватна архива