Македонката Оливера беше на Super Bowl: „Билетите се продаваат и за над 10.000 долари, пеев опера на ТВ пренос во живо“

Детали

вторник, 13 февруари 2024

„Ова беше искуство што нема никогаш да го заборавам. Годинава имаше навистина многу ѕвезди на стадионот, а Тејлор Свифт беше најголема од сите. Нејзината ложа беше спроти нашата, но ако зумираш со телефонот, можеше многу лесно да ја видиш“, вели Оливера Ѓоргоска, која беше на Super Bowl 2024.

Македонската пејачка Оливера Ѓоргоска, која публиката ја памети по шоуто „Моја ѕвезда“, скоро десет години живее во Лас Вегас.

Таму замина на музичко дошколување, но остана да живее во САД, каде што работи и како професорка по музичко и вокален тренер (vocal coach) за некои познати личности.

Оливера во годините поминати во Лас Вегас често се сретнува со светските ѕвезди, а меѓу нив се и Селин Дион и Шекил О’Нил, за кого вели дека е прекрасен човек, и веќе разговарале за музичка соработка, бидејќи познатиот кошаркар и рапува.

Таа деновиве објави и селфи со пејачот Пост Малоун, кој на 11.02 го отвори Super Bowl 2024.

Tокму Super Bowl, најголемиот спортски настан во САД, се одржа во Лас Вегас.

А нашата Оливера беше една од илјадниците луѓе на стадионот кои го гледаа финалето на рагби сезоната во живо.

Таа за CRNOBELO.com ги раскажа своите впечатоци:

„Ова беше искуство што нема никогаш да го заборавам. Годинава имаше навистина многу ѕвезди на стадионот, па тука беа Кели Кларксон, Џеј Зи, Ким Кардашијан, Блејк Лајвли и Тејлор Свифт како најголема ѕвезда од сите.

Нејзината ложа беше спроти нашата, но ако зумираш со телефонот, можеше многу лесно да ја видиш. Ја имаше често на големите екрани, па ја даваа дури и како пие пиво на екс додека седи во ложата и навива.

Шоуто на Ашер беше лудо. Сцената ја склопија за десет минути, беше неописливо искуство да се гледа целиот негов настап во живо.

Ние секоја година навиваме за Chiefs, кои постојано победуваат, но оваа година решивме да смениме и да навиваме за San Francisco 49ers, но тие на крајот изгубија.

Пред да влеземе на стадионот, со другарките зборувавме за Telemundo, позната американско-шпанска телевизиска мрежа во САД. Јас дури им пеев и опера во живо.  

Инаку, најевтината влезница е 4.000 долари, а како се наближува денот на финалето, некои ги препродаваат и за над 10.000 долари“.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело