Четворица Македонци добија органи од починат донор: Нова успешна трансплантација на нашите доктори

Детали

петок, 15 март 2024

„Направена е уште една мултиорганска трансплантација на органи - еден пациент доби срце, еден црн дроб, двајца пациенти добија бубрези, а во наредните денови пациенти од Универзитетската клиника за ортопедија ќе имаат шанса да добијат и коскени ткива“ - велат од Министерството за здравство.

Семејството на починатиот битолчанец Пеце Аврамовски, како што пишуваат блиските на социјалните мрежи и на битолските медиуми, ги донираше неговите органи и со тоа, досега, се спасени четири животи - еден пациент доби срце, еден пациент доби црн дроб, а двајца пациенти добија бубрези.

За хуманиот подвиг на семејството од Битола, но и за успешната мултиорганска трансплантација, соопштија од Министерството за здравство, од каде што открија и детали за четирите операции.

„Во текот на вчерашниот ден е направена уште една мултиорганска трансплантација на органи во којашто еден пациент доби срце, еден пациент доби црн дроб, двајца пациенти добија бубрези, а во наредните денови пациенти од Универзитетската клиника за ортопедија ќе имаат шанса да добијат и коскени ткива“.

Министерот Демири му се заблагодари на семејството на донорот коешто се одлучи да ги донира органите од нивниот близок и со тоа да спасат најмалку 4 животи.

„По добиената согласност од семејството, вчера во раните утрински часови започнаа трансплантациите на срце, црн дроб, бубрези и коскени ткива. Огромна благодарност до семејството на донорот, кои повторно нè потсетија на важноста, на емпатијата и на хуманоста и во најтешките моменти од животот.

Нивната одлука денес значи нов живот за некого. Од вчера спасуваме најмалку 4 животи. Дарувањето органи е највисокиот чин на алтруизам кои сите нас нè прави подобри луѓе. Голема благодарност и до сите медицински тимови кои овие 48 часа работат со пациентите и се грижат за нивното здравје“, изјавил министерот Демири, а пренесоа на Фејсбук страницата на Министерството за здравство.

Таму е објавен и податокот дека од 2020 година досега се трансплантирани 11 срца, 4 црни дробови, 38 бубрези и 24 коскено ткива, односно 77 органи.

А. Ј. | Црнобело