Матеја ја запроси саканата Драгана во Виетнам: Романтика на зајдисонце во ресторан на плажа

Детали

среда, 08 мај 2024

„Мислев дека ќе ме запроси во Тајван, бидејќи пред да отидеме во Виетнам, таму живеевме 2 месеца. Прстенот го купил во Македонија и цело време го носел со него“, ни раскажа Драгана за романтичното запросување на плажа.

Драгана Стојановска (29) од Куманово и Матеја Николовски (33) од Скопје, по шест години врска се свршија додека беа на патување во Виетнам.

Двајцата работат во ИТ компании и поради работните обврски на Матеја, два месеца живееле во Тајван. 

Во ова време Драгана очекувала тој да ја побара за сопруга, но кога не се случило тоа, некако се откажала од идејата дека можеби во Македонија ќе се вратат свршени.

Пред да се вратат од Тајван во Македонија, тие неколку дена поминале на одмор во Виетнам. А таму, Матеја сепак ја изненадил Драгана и извадил свршенички прстен додека вечерале на плажа, па клекнал на колена во моментот кога сонцето заоѓало.

Драгана за CRNOBELO.com ја сподели нивната романтична приказна:

„Се запознавме во кафе бар во Скопје, преку заеднички пријатели за дочек на Нова година (2015), но во врска сме од декември 2017 година, откако повторно стапивме во комуникација преку Инстаграм.

Имаме разговарано на темата брак и знаевме дека ќе се случи, бидејќи и двајцата го сакавме тоа. Иницијално, мислев дека ќе ме запроси во Тајван, бидејќи пред да отидеме во Виетнам, живеевме во Тајван 2 месеца.

Матеја беше пратен на работно патување во Тајван преку неговата компанија каде што работи како customer support team lead, а јас решив да дојдам со него.

Добив одобрување од мојата ИТ компанија, каде што сум data engineer, за да работам од Тајван.

Но, во текот на тие 2 месеца се откажав и мислев дека сепак нема да ме запроси. Ова чувство траеше сè до денот на самото запросување во Виетнам, кога ми рече да се спремам затоа што сака да ме однесе на романтична вечера.

Тогаш повторно сомнежите беа разгорени во мене.

Матеја не бил до овој степен романтичен во текот на нашата врска. Но самото запросување беше преромантично.

Имавме вечера на самата плажа. Небото беше во магични бои. Клекна на колена во моментот кога сонцето заоѓаше. Буквално, за мене, целиот момент беше како во бајка.

Бев пресреќна. Уште сум пресреќна. Не можев да престанам да се смеам, очите ми беа наполнети со солзи од среќа. Иако се посомневав дека ќе ме запроси, рацете и нозете ми се тресеа од трема.

Прстенот ми е малку поголем, но, очекувано беше. Го бирал сам и без никаква помош. Сепак, кога го гледам самиот прстен, се гледам себеси. Не можел да избере подобро за мене.

Инаку, прстенот е купен во Македонија и тој го носел со него за време на целиот наш престој во Тајван.

Тоа значи дека 2 месеца го носел прстенот со него од хотел до работа и од работа до хотел. И поминал неколку аеродроми со прстенот во себе.

Родителите беа првите што дознаа дека ќе се венчаме. Плановите за свадба се во тек, но уште немаме ништо конкретно одлучено“.

Повеќе фотографии од запросувањето на Драгана:

©CRNOBELO.com Забрането преземање и копирање. Крадењето на авторски текстови е казниво со закон. 

А. Ј. | Црнобело