Елена од гевгелиско спаси и трет штрк: „Девојчиња го донесоа кај мене со повредено крило“

Детали

петок, 05 јули 2024

„Вториот штрк е здрав и во август ќе може да одлета, а третиот има повредено крило и не верувам дека ќе може да одлета“ – раскажува хуманата гевгеличанка Елена Алексовска, која во една недела во својот дом прими уште два штрка за кои треба да се грижи.

Елена Алексовска од гевгелиско на македонската јавност веќе ѝ стана позната како жената што се грижи за штркови.

За неа јавноста дозна уште на почетокот на годинава, кога CRNOBELO.com ја објави приказната за штркот Мишко, кого таа го спасила.

Мишко кај неа ја презимил минатата зима, а сега во само неколку дена, нејзиниот дом е побогат за уште два штрка.

Елена на почетокот на неделава мораше да го вдоми вториот штрк, кого го нашла откако деца го тепале со стапови.

Откако оваа приказна беше пренесена на CRNOBELO.com, Елена доби уште еден „пациент“ за кого треба да се грижи.

Елена за нашите читатели споделува фотографии од третиот повреден штрк што кај неа го донеле две девојки од Миравци откако слушнале дека таа може да му помогне.

„Девојките од Миравци го оставија кај мене бидејќи одбивал да јаде.

Кај мене јаде, ама има повредено крило и не ми се верува дека ќе лета“ – вели Елена.

Таа ни појаснува дека вториот штрк, што го нашла во понеделникот, е потполно здрав и дека за еден месец, со добра храна и грижа ќе биде целосно здрав да се врати во природата и да му се приклучи на своето јато - таман на време кога тие ќе си одат на југ.

„Третиот штрк е со повредено крило и мислам дека нема да може да замине“ – вели Елена.

Елена вели дека Мишко, првиот штрк за кој се грижи повеќе од една година, редовно сам лета по неколку часа во природата и се враќа дома, но таа е загрижена дека ако ги пушти другите два штрка надвор, сами нема да можат да опстанат и решена е несебично да им помогне сè додека не заздрават.

Инаку, за потсетување, Елена е медицинска сестра во пензија, која целиот свој работен век го посветила вршејќи ја својата хумана дејност и помагајќи им на пациентите.

Денес во својот дом во гевгелиско освен за штрковите, се грижи и за кучиња и за мачки, на кои им посветува неизмерна љубов, грижа и внимание.

„Тие ми ја полнат душата со енергија, дефинитивно се посветувам на животните.

Бев несебично посветена и кон луѓето. На ниту еден кој ми дојде на врата не го одбив да му помогнам, инјекции, преврски, инфузии, мал број од луѓето тоа ми го паметат.

Кога умираше брат ми пред две години, не само што не ми помогнаа, туку како да му пресудија смртна пресуда.

Затоа изгубив верба во луѓето, иако и сега како пензионерка помагам, но се посветувам на животните“ – вели Елена.

Елена вели дека нејзината болка за братот е ненадминлива, а токму во негова чест го крсти и првиот повреден штрк за којшто почна да се грижи и кој се вика Мишко.

Прочитајте и Елена од Гевгелија 1 година се грижи за штрк: „Го пуштив да си оди, но не сака“

Б. С. Б. | Црнобело