Славчо Попоски, метеоролог: „Поради топлотниот бран Луцифер, екстремно високи температури и следната недела“

Детали

петок, 09 август 2024

„Tоплотниот бран Луцифер ќе зафати голем дел од Европа, вклучувајќи ја и Македонија и температурите ќе бидат повисоки и за 10 степени Целзиусови од вообичаените за овој период - ќе се искачат до, па дури и над 40 степени Целзиусови“, вели метеорологот Славчо Попоски.

Покрај досегашните топлотни бранови што ги почувствувавме летоска, следната недела нè очекува уште еден.

Не само Македонија, туку поголемиот дел од Европа ќе биде на удар на топлотниот бран Луцифер.

Во продолжение, прогнозата на Славчо Попоски:

„Следната седмица, и тоа почнувајќи од понеделник, во Европа ќе има големи температурни аномалии.

Од една страна, ние во Македонија, како и целиот Балкански Полуостров ќе биде зафатен од топлотниот бран Луцифер и истиот ќе услови насекаде да има екстремно високи температури на воздухот кои на многу места ќе се искачат до околу, па и над 35 степени Целзиусови.

Локално во регионот, како и во нашата Македонија, температурите ќе се искачат до, па дури и над 40 степени Целзиусови.

Од топлотниот бран Луцифер ќе биде зафатен најголем дел од Европскиот континент, особено јужна, југоисточна, и југозападна Европа.

Температурите ќе бидат значително над просекот, односно тие ќе бидат повисоки од нормалните дури и за повеќе од 10 степени Целзиусови.

Од друга страна, североистокот и истокот на континентот ќе биде зафатен од циклонска активност и од многу постуден воздушен бран, кој ќе услови во овие предели да има врнежливо и невообичаено студено време за месец август.

„Во нашиот дел од континентот, врнежите и понатаму ќе бидат значително потпросечни, што значи дека сушата ќе ја имаме и следната седмица.

Токму поради ова, но и поради екстремно високите температури, останува зголемениот ризик од појава на нови шумски пожари, па затоа апелираме граѓаните да бидат крајно внимателни како се однесуваат со природата“.

Спирова С. | Црнобело

фото: Фејсбук, freepik.com