Зоки Фаци ќе оди на операција во Истанбул: „Исплашен сум, ова ми е трета операција – но се обидувам со добра мисла да победам“

Детали

вторник, 20 август 2024

„Веќе нема да се чека, Зоки Фаци ќе оди на лекување во Истанбул“ – ова го соопшти на Фејсбук неговиот пријател и соработник Стефан Лазаров. Зоки, пак, признава дека е исплашен пред третата операција, но се обидува со добра мисла и позитивна енергија да го победи ракот.

Во саботата Стефан Лазаров објави јавен апел за собирање донации за да му се помогне на новинарот Зоран Василевски, попознат како Зоки Фаци, да оди на операција во која ќе му биде отстранет туморот со големина од 25cm.

Вчера, во понеделникот (19.08), доцна вечерта Стефан соопшти дека се при крај со собирање на средствата и дека Зоки дефинитивно ќе оди на лекување во Турција.

„Здраво луѓе, можам да ве известам и израдувам дека Зоки официјално ќе се лекува во Турција поради вашата помош!

Во моментов ја чека понудата од болницата и колку ќе чини целиот процес за да знаеме на што сме. Можам да ви потврдам дека сме при самиот крај, но најбитно од сè е дека веќе нема да се чека и за неколку дена тој оди во Истанбул... Да сте ми живи и здрави!“ – порача Стефан.

Инаку вчера во текот на денот и Зоки им се обрати на своите следбеници на Инстаграм.

Тој им се заблагодари на сите оние што несебично му ја дале поддршката во неговата борба за животот.

„На сите пријатели, роднини, луѓе коишто не ги познавам сакам да им кажам: ‘Фала’, затоа што поминувам низ некој тежок период.

Односно ова ќе биде моја трета операција. Сакам само да ве известам дека во Истанбул веќе ме чекаат, најавен сум во најголемата болница за канцер во Европа.

Јас секогаш сум бил искрен со вас, сакам да бидам искрен и со вас, и пред јавноста и пред Бога. Сакам само да ви кажам дека многу сум исплашен.

Ова ќе ми биде трета операција во Истанбул, ама јас ќе се потрудам да ја издржам и таа на нога.

Знаете, тешко е – ракот е многу тежок противник, ама јас се обидувам со добра мисла и со позитивна енергија да го победам...

Така што - држете ми среќа, наскоро купувам карта и одам за Истанбул“  - рече Зоки во Инстаграм Стори.

Б. С. Б. | Црнобело