„Бев на премиерата на новото македонско кабаре во Гевгелија - што ме воодушеви?“

Детали

понеделник, 21 октомври 2024

Со другарките стигнавме во моментот кога почна првата точка - пејачот Даниел Данн, гол од половината нагоре и свртен со грб, почна да го пее хитот на Queen, I Want to Break Free, додека танчарките му облекуваа жолта јакна, во стилот на Фреди Меркјури. Како си поминав на премиерата на новото кабаре „Еуфорија“?

Во петокот (18.10) во едно од казината во близина на граничниот премин Богородица во Гевгелија, имаше премиера новото македонско кабаре „Еуфорија“.

Најавата за кабарето ја гледав веќе некое време на социјалните мрежи, а бидејќи немавме планови, со неколку другарки решивме да отидеме на викенд во Дојран, а оттаму и на првото шоу на „Еуфорија“.

Фото: Инстаграм

Знаевме дека одиме во казино, плус на премиера, па се дотеравме, седнавме во автомобилот и за околу половина час стигнавме од Дојран во Гевгелија.

Бидејќи првпат одам таму, откако се регистрирав (со отпечаток од прст), ми кажаа дека добивам 10 евра кои можам да ги потрошам вечерта.

Во моментот кога стигнавме го фативме и почетокот на шоуто.

Пејачот Даниел Данн, гол од половината нагоре, свртен со грб, почна да го пее хитот на Queen, I Want to Break Free, додека танчарките му облекуваа жолта јакна, во стилот на Фреди Меркјури.

По ова се редеа музички точки, многу сценски настапи, акробации, девојки кои танцуваа, актери и актерки кои пееја и ги забавуваа гостите.

И додека актерката Јана Стојановска пееше, момче возеше ролшуи на сцената околу неа и му даваше поинаков шарм на нејзиниот настап.

А од музика имаше сè - се пееја и светски и балкански хитови, песни од Елвис Присли, Muse, Дона Самер, Константинос Аргирос, песни од филмот Grease...

Но, ја испеаја и победничката песна на Евровизија, Euphoria од Лорин, по која кабарето и го добило името.

Искрено, уживав во позитивната енергија на младите пејачи, актери, танчари и акробати кои се вклучени во кабарето.

Насмеани, среќни, дадоа сè од себе премиерата да помине одлично, а луѓето кои се дојдени во казиното да се забавуваат, бидејќи кабарето е направено токму за нив.

И мислам дека успеаја во тоа. Кога ќе почнеше некоја песна, многумина престануваа да разговараат и им го посветуваа своето внимание на артистите на сцената.

Имаше и такви кои стануваа и одеа од една до друга сцена (бидејќи во големата сала има две сцени, едната поставена горе, а друга на средината на просторот) за да бидат поблиску до изведувачите, да сликаат, да снимат некое видео.

Меѓу сцените има и скали, а луѓето застануваа за да гледаат поубаво и не штедеа аплауз по секоја точка.

Меѓу гостите го видов и Владо Јаневски, па имам впечаток дека и нему му се допадна тоа што го гледа.

И сега, знам дека се повторувам, но мора да кажам уште еднаш - новото кабаре навистина ме воодушеви.

Блескави костими, девојки кои се вртат на трапез, згодни момци, интересни кореографии, соло и групни точки и вистинска еуфорија на сцената - едноставно нешто што треба да се доживее.

Што се случи со среќата? Па, ги загубив првите 10 евра, а потоа уште 10.

Но, одлично се забавувавме, па мислам дека одењето на кабаре во петок навечер беше вистински избор да се види нешто ново и несекојдневно кај нас.

П. С. Ми се чини дека ќе одам пак да го гледам кабарето, но кога ќе почнат со настапите во Скопје.

Погледнете и видеа од премиерата на кабарето:

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело / фото: Инстаграм