Малите херои Вукашин и Ана заѕвонеа на ѕвончето во Детската клиника во Скопје - се изборија лавовски со ракот

Детали

четврток, 26 декември 2024

„Дај Боже секое детенце кое се бори со ваква состојба (нема да ја наречам болест) на крај да биде победник и да ѕвони најсилно! Сите дечиња да се здрави и живи во целиот свет“, порача Бранка Столиќ, мајката на малиот херој Вукашин.

На Фејсбук профилот на Бранка Столиќ осамнаа прекрасни видеа и фотографии направени вчера (25.12) на Детската клиника во Скопје.

Нејзиниот син Вукашин и неговата другарка од болница Ана, заѕвонија на ѕвончето во клиниката, откако успешно се изборија со ракот.

Бранка на Фејсбук напиша:

„Господе, слава ти!

Ова за нас е ГОЛЕМ ден, на Детската клиника ѕвоното ѕвонеше два пати најсилно. Суперхероите Вукашин и Ана се изборија лавовски, го пребродија цел период храбро и достоинствено.

Благодарност до целиот медицински персонал на Одделението за онкологија и хематологија, луѓе со големо срце.

Благодарност и до нашите најблиски, роднини, сите пријатели, колеги... Вашата молитва и поддршка ни беше многу значајна. Бура од емоции, солзи, насмеани лица, најголем аплауз...

Дај Боже секое детенце кое се бори со ваква состојба (нема да ја наречам болест) на крај да биде победник и да ѕвони најсилно! Сите дечиња да се здрави и живи во целиот свет.

Денес ние излеговме победници и го огреавме сонцето.

Уште еднаш Господе слава ти“.

Видеата погледнете ги ТУКА.

С. С. | Црнобело