Таско никогаш поискрен: Си го честита роденденот со песна за личните демони и необјавени семејни видеа

Детали

вторник, 25 февруари 2025

Преку искрени стихови Таско раскажува за својата внатрешна борба, личните демони, алкохолот, работите кои му ја уништуваат самодовербата, но и за желбата да се врати на својот посакуван пат.

Нашиот музичар Христијан Тасковски - Таско, денес (25.02) полни 29 години.

На роденденот тој реши да ја објави својата нова песна, насловена „Листот“.

А во неа, преку искрени стихови Таско раскажува за својата внатрешна борба, личните демони, алкохолот, работите кои му ја уништуваат самодовербата, но и за желбата да се врати на својот посакуван пат.

Песната е спој од убави и не толку убави лични искуства низ кои Таско минувал, но и видеа преку кои најреално се гледа како неговото расположение се менува низ годините.

Во досега необјавените видеа, Таско споделува моменти од раѓањето на синот, детските игри со него, настапите, раѓањето на ќерката и моментите поминати покрај неа.

Во дел од нив тој е насмеан и пресреќен, во дел е тажен и меланхоличен, со празен поглед.

„Кај е тој Таско што викаше не постои не, кај е тој Таско што викаше ќе зима сè, кај е тој Таско што викаше дека е ѕвер? Кај е тој Таско што беше искрен пред сè?“

„Го изгубив“.

„Ај полека, ќе станеме пак, таков е овој пат, го помина еднаш и знам колку си јак“- се дел од стиховите во песната.

Видеото завршува со снимка од Таско кој ги држи во прегратка своите две деца и ги дува свеќичките на роденденската торта за да го прослави својот 29-ти роденден.

Погледнете го видеото:

А. Ј. | Црнобело