„Осамна утро сончево, а зраците темни, црнила“ - Македонија се простува од 59-те жртви кои ќе бидат погребани денес

Детали

четврток, 20 март 2025

Денеска ќе бидат погребани 59-те жртви од пожарот во Кочани. 59 млади животи кои згаснаа во само неколку минути. 59 семејства кои останаа без своите сакани.

На денот кога цела нација тагува и ги испраќа во вечното почивалиште, социјалните мрежи се преплавени со тага.

Велат, денес е првиот ден на пролетта, но сончевите зраци ќе ги заменат солзите за оние што веќе никогаш нема да се вратат.

Едните херои, што пробаа да спасат што е можно повеќе луѓе, другите жртви чија трагична судбина ќе остане засекогаш врежана во мислите на сите.

Денес од починатите во дискотеката во Кочани се простуваат и оние што ги познаваа и оние што не ги знаеја.

А болката е огромна.

На Инстаграм од утрово се споделува порака која ја опишува болката на сите:

„Осамна утрото сончево. А сончевите зраци денес темни, црнила...

Најцрниот ден во македонската историја. Масовен погреб на деца за време на најголемите христијански пости.

И не знам дали имаше мајка што синоќа мирно спиеше. И не знам дали од оваа црнила некогаш ќе се опоравиме како нација...

Почивајте во мир агелчиња наши“ - стои во пораката со која од 59-те жртви се простува целата нација.

 А. Ј. | Црнобело