Сандра Кирков и по 5 месеци ја лекува пневмонијата: „Уште не е повлечена, пијам кортико и ги имав сите лоши нус-појави “

„Правеше ли бронхоскопија? Ако да, какво е искуството - треба да правам за 9 дена и страв ми е“ - ја прашаа Сандра.

А, таа одговори дека правела не една, туку две бронхоскопии:

„Втората беше со биопсија. И јас не сакав и се плашев ама мораше, нема тука сакаш не сакаш кога се работи за здравје.

Процедурата е безболна, но дефинитивно непријатна бидејќи ти влегува тенко цевче преку нос во белите дробови, ти земаат примерок од ткивото за испитување и толку.

Се изведува со локална анестезија, ми се чини траеше околу 15 минути.

Цел тим е присутен за време на бронхоскопијата, така што немој да се плашиш, во одлични раце си“.

„Постојано ли беше со висока температура? Брат ми само 3 дена имаше со неговата пневмонија“ - ѝ напишаа во пораките на Сандра.

„Не бев, генерално ми беше 37.5-38.2, и ова беше, ми се чини највисоката, само еден ден. Уште тогаш кажував и, еве, пак ќе спомнам - не се споредувајте со никого.

Ако сметате дека нешто не е во ред одма одете на лекар. Ако имате каков било сомнеж за што било поврзано со здравјето, консултирајте се со лекар.

Тоа е секогаш најправилно. Јас си бев Гугл доктор, а нешто ново ќе чујам - одма гуглав да видам што ми е. За среќа, ништо од тоа не ми беше, бидејќи нормално, сè најлошо ми излегуваше на Гугл.

Во еден момент докторот сфати дека читам на интернет сешто и се смеевме дека ми забрани да гуглам и да си мерам температура на саат време.

Ама што да правиш кога си на мака“ - одговори таа.

„Зошто си уште на терапија после толку време со антибиотици? Имаш ли искуство со кортико стероиди? Јас ги пиев 3 недели, ме упропастија“ - ја прашаа.

А Сандра одговори:

„Иако сум пуштена дома, сè уште не е скроз сè повлечено. Во петокот, на последната контрола видоа големо подобрување, меѓутоа не комплетно.

За жал не завршува сè во моментот кога ќе излезеш од болница, но дефинитивно сме на добар пат.

За второто прашање - да, имам искуство, моментално сум на кортико и ќе бидам додека докторот не одлучи поинаку.

Ги пијам скоро 3 месеци и буквално ги имам сите нус-појави, полудував на моменти ама издржав, што да се прави кога добро ми делуваат на дробовите.

Од петокот сум на помала доза, па се надевам дека полека ќе исчезнат и овие неколку што уште ги имам.

Кога ме пуштија дома почнав со голема доза кортико, по некое време, преку ноќ се разбудив вака и главата ми беше тркалезна (moon face syndrome), најтипични нус појави.

Плус несоници, не можев да спијам до 3-4 сабајле, задржување на течности, промени во расположение.

Тој период слабо излегував, немав многу сила да пешачам, а и не можев да се гледам, поготово затоа што тие што лично ме познаваат имаа коментари „Што ти е со фацата?“, „Што си правела на лицето“, „Абе, кој има обравчиња“, „Е, вака те личи, со плус некое килце“ итн, па почнав да се нервирам зошто на сите им објаснував дека ми е поради кортикото, дека ќе се повлече кога ќе го прекинам и слично.

Потоа, како ми се повлекуваше отокот, така почнаа и пофалбите дека сега сум поарна и така си помина цел месец.

Ова го кажувам бидејќи стварно не е лесно да ги пиеш таблетиве на долги патеки, кој пиел ме разбира, и јас ве разбирам доколку имате симптоми ко моиве.

И ти се вришти, и ти се плаче, и си викаш ‘Зошто мене сето ова’, но еве, сè поминува, само бидете јаки и одлучни дека ќе истерате до крај.

Сандра доби и порака од медицинските сестри кои се грижеа за неа:

„Кажи им дека многу добро те чувавме“ - напишаа.

„Најдобро на цел свет. Подобро не можевте. И, златни сте! Стварно не знам психички како ќе издржев да не ми беа тука за муабет, за смеење, па и за плачење.

Засекогаш ќе ви бидам благодарна. Само вие си знаете како ви е секој ден“, вели Сандра.

И на крајот заврши со мислата „Не беше лесно, но научив дека и најтемните денови поминуваат. Сега знам дека во мене има повеќе сила отколку што некогаш сум мислела“.

Прочитајте и Сандра Кирков за пневмонијата: „Доктор ми го виде рендгенот и врескаше ‘Ти ќе умреш ако не лежиш во болница’“

А. Ј. | Црнобело