Психолог од Свети Николе со вирална објава: „Не ме малтретира, не ме понижува, само... Не го оправдувајте психичкото насилство“

Детали

вторник, 14 октомври 2025

„'Не беше насилен, само понекогаш зборуваше построго', вели жена која се тресе секојпат кога некој ќе го подигне тонот...“, гласи дел од објавата што ја сподели Стефанија Арсова од Свети Николе и порачува: „Психичкото насилство нема модрици, но има последици што траат многу долго и остава најдлабоки лузни. Да не го негираме и да не го оправдуваме со 'таков му е карактерот'“.

Стефанија Арсова од Свети Николе е дипломиран психолог, а тековно е и на едукација за семејна и системска психотерапија.

Таа сподели Фејсбук објава за жените и насилството врз жените, која стана вирална.

Виралната објава гласи:

„Не ме малтретира, само правеше да се чувствувам виновна за сè“, вели жена која денес не може да донесе одлука без да побара дозвола од некого.

„Не е насилство, само сакаше да знае каде сум секоја минута, со кого и зошто“, вели девојка која паничи секогаш кога ќе ѝ стигне порака на телефонот.

„Не е манипулатор, едноставно знае како да ми објасни дека грешам“, вели жена која повеќе не верува во сопствената перцепција.

„Не ме контролира, само се грижи за мене“, вели жена која денес се плаши од мир во домот, затоа што научила дека по тишината секогаш следува бура.

„Не ме изолираше, само сакаше да поминуваме повеќе време заедно“, вели девојка која денес нема кому да се јави.

„Не ми ја уништуваше самодовербата, само ме тераше да бидам подобра“, вели жена која не може да се погледне во огледало без критика.

„Не ми велеше дека сум лоша, само дека никој друг не би ме трпел“, вели девојка која останува во токсична врска, колку и да боли.

„Не беше груб, само знаеше да ме стави на мое место“, вели жена која секој пат се извинува кога ќе каже свое мислење.

„Не ме понижува, само ме споредуваше со другите за да се подобрам“, вели жена која не се чувствува доволно добра.

„Не ме игнорираше, само му требаше простор“, вели жена која се навикна да моли за внимание.

„Не e нарцис, само бараше внимание кога не му е денот“, вели жена која секогаш мора да биде добро расположена за да не го „испровоцира“.

„Не ме тераше да се менувам, само ми велеше дека никој нема да ме сака ваква“, вели жена која денес се извинува кога плаче.

„Не беше насилен, само понекогаш зборуваше построго“, вели жена која се тресе секојпат кога некој ќе го подигне тонот.

И така, живееме меѓу нив - тие што „само сакаат најдобро“, тие што „само се грижат“, тие што „само кажуваат како е“.

Манипулацијата не е љубов. Контролата не е грижа. Потценувањето не е мотивација.

Психичкото насилство нема модрици, но има последици што траат многу долго и остава најдлабоки лузни. Да не го негираме и да не го оправдуваме со „таков му е карактерот““.

С. С. | Црнобело