Каролина со носталгија се сети на својата прва насловна: „Имав неполни 13 години, ме сликаа во куќата каде пораснав во Битола“

Детали

среда, 10 декември 2025

„Мислев дека само мојата сакана баба Љупка имаше ваква архива“, напиша Каролина откако пријатели ѝ ја испратија фотката од нејзината прва насловна страница, а која беше споделена на Фејсбук.

Каролина Гочева, една од нашите најголеми музички ѕвезди, многумина ја паметат уште од времето кога ја испеа „Мамо пушти ме“ и веднаш стана миленичка на публиката.

Иако оттогаш поминаа 34 години (песната е испеана на Макфест 1991), Каролина и понатаму пее, снима нова музика, одржува концерти.

Денес, таа е и заштитно лице на бројни брендови, зад себе има многу фотосесии, како и фотографирање за корици за албуми, едиторијали, насловни страници.

Но, пред само неколку дена, таа сподели фотографија од својата прва насловна страница, направена во време кога Каролина немала полни 13 години.

Откако пријатели ѝ ја испратиле фотографијата, објавена на Фејсбук-страницата ВБУ Музички регистар, таа со носталгија ја раскажа приказната како настанала оваа фотка.

„Јас со неполни 13 години првпат на насловна на Екран. За оние кои не знаат, тогаш Екран беше веројатно најзначајниот пишан музички медиум кај нас.

Кога ми ја испратија сликава, во погледот си ја видов возбудата и тремата што како срамежливо и несигурно детенце ја почувствував кога се јавија и кажаа дека сакаат да ме сликаат за насловна.

Една недела подоцна, дојдоа дома во Битола, во куќата каде пораснав.

Сликава ме натера и да размислам колку време е поминато од тогаш, заедно со еден куп исполнети и неисполнети желби и соништа (како и во сечиј живот).

Единствено останаа непроменети мојата желба музиката да биде дел од мојот живот и мојата верна придружничка - тремата.

Секако, благодарност до ВБУ Музички регистар што постојано изненадуваат со вакви заборавени blast from the past моменти.

Па дечки, мислев дека само мојата сакана баба Љупка имаше ваква архива“, напиша Каролина.

А. Ј. | Црнобело