Тони Михајловски за односот со постариот син: „Јас сум се изборил со своите пороци и бадијала ќе беше да му зборувам“

Детали

вторник, 16 декември 2025

„И мене ми фали тој период, не само на него, меѓутоа низ годините успеавме да изградиме здрав однос, да станеме другари, и знае дека никогаш нема да го зезнам за 3 работи на кои секој другар ќе киксне - женска, пари и позиција“, вели Тони Михајловски за постариот син Александар со кого долго време имаше студен однос.

Актерите Тони Михајловски и Игор Џамбазов беа гости во подкастот на Стефан Лазаров, каде освен за кариерата и нивното пријателство кое трае со децении, зборуваа и за приватниот живот и пороците со кои се избориле низ годините.

Во еден момент, Стефан ја начна темата за односот на Тони и неговиот постар син Александар, кого пријателите и дел од јавноста го знае по прекарот „Хонда“.

Па му се обрати на Тони:

„Кога беше тука Хонда, спомна дека си му фалел како улога на татко во еден дел од живот“.

Во своето гостување пред неколку месеци, Александар рече: „Сум имал моменти кајшто, на пример, во секојдневието ми фалело. Ете, никогаш не сум бил на одмор со моите. Кога станав актер, сфатив зашто татко ми бил толку отсутен“.

Тони, кој го гледал гостувањето на својот син кај Лазаров, му одговори:

„Ја, отсекогаш моите два сина, постариот и помалиот, ги учам на тоа дека треба да го кажат тоа што го мислат, да бидат свои луѓе, дека не треба да затскриваат ништо и дека треба да размислуваат со сопствена глава.

И мене ми фали тој период, не само на него, меѓутоа успеавме, некако, ваљда низ годините да ги компензираме работите, па успеавме да изградиме еден многу здрав однос со Александар.

Ние сме другари, пред сè, па после колеги, па потоа, дури на трето место доаѓа татковството, затоа што татко може да биде секој, да се направи дете и не е многу тешка работа.

„Но да бидеш човек“, како што вика во „Варвари“ една реплика ликот што го играм јас, „е тоа е татко“.

Има многу татковци, но не се сите на нивото што треба да бидат“.

На ова се надоврза Игор, па вели:

„Што мислиш, дека татко ми Џамбаз имал време за мене кога сум бил мал? Па, ја не го гледав“.

А Михајловски продолжи:

„Татко ми беше тракториста, па ни ја не го гледав.

На пример, она што Александар сега го сфаќа дека со својата работа, и он тоа и го кажа, нели, дека и он сега разбира што значи да се нема време, да не можеш да се посветиш на она што ти е тука пред очи.

Ние успеавме да станеме другари, успеавме да си ја изградиме вистината, секогаш може да ми каже што мисли, знае дека јас сум му најдобриот другар во светот, дека никогаш нема да го зезнам за три работи на коишто секој другар ќе киксне.

Тоа се женска, пари и позиција. За тие работи од мене е безбеден“ - вели Тони.

На ова се надоврзува Игор, кој вели дека Тони бил секогаш бил фер со својот син, дури и кога Александар имал проблеми.

„Се обиде еднаш двапати да му помогне и го стави на чекање, на листа. Не на игнор, туку на стенд бај го стави. Ми викам: ‘Што праиш бе?’, и Тони ми вика: ‘Остај го бе, нека види, како ќе научи...’.

И после стварно се случи тоа, само еден ‘свич’ му се деси на Хонда и он е сега пример, како што ја бев пример од моето време, Хонда е пример од ова време како можеш да се подобриш себеси,“ открива Џамбазов.

„Ја сум кажал - Џамбаз највише ги има повредено блиските околу себе, ја исто со моите испади.

Јас исто сум се изборил со своите пороци и бадијала би било да сум му зборел на синот, ако јас не го чујам внатрешниот глас“, вели Тони.

Погледнете го видеото:

А. Ј. | Црнобело