Дечко од Скопје: „Бев во локал во Дебар Маало, 2 часа го слушав Игор Џамбазов - зошто ме восхити?“

Детали

среда, 18 март 2026

Јас неретко знам да кажам: „Среќни сме што живееме во време на уметник и шоумен од типот на Игор Џамбазов. Таков талент и харизма се неповторливи“ и сега ме воодушеви писателот Мартин Јовановски од Скопје, кој по настап на Игор, ги сподели јавно импресиите и восхитот. „Пред малку се вратив од Дебар Маало, 2 и кусур часа на бината беше Игор Џамбазов, каква дефиниција за уметност...“, започнува тој.

Игор Џамбазов не е уметник, тој е магија во форма на човек. Нема нешто што не умее... Пее, глуми, пишува, рецитира поезија, едноставно доминира на сцената и најважното - знае да побуди емоција апсолутно во секој еден од нас.

Токму на тоа посведочи сега и нашиот писател Мартин Јовановски, кој восхитен од енергијата на Џамбазов за време на настап во скопски локал, му посвети емотивна објава.

Инстаграм скриншот

Мартин за Игор вели:

„Пред малку се вратив од Дебар Маало, 2 и кусур часа на бината беше Игор Џамбазов во придружба на Гуру Харе и својот бенд.

Полн импресии, можам само да кажам дека Игор Џамбазов сам по себе е уметност. Македонска гордост, величина, магија, дефиниција за уметност!

Без пауза, без застанување, со насмевка и нереална енергија која несебично ја делеше на сите присутни во публиката, без сценарија, без никаков потсетник, без ниту едно парче хартија пред себе, тотално издоминира.

Инстаграм скриншот

И овој пат не заборави на македонската култура, историја и традиција, низ стиховите и неговиот препознатлив блуз најде можност да ги вметне и стиховите на Константин Миладинов, Кочо Рацин и народната Дефино вино црвено...

И иако уште би пишувал, доцна е, подобро тука да финиширам. А ќе завршам со зборовите на другар ми Никола:

„Колку сме само среќни, утре ден ќе се фалиме дека сме биле тука, дека во живо сме го слушале, дека од прв ред сме сведочеле...“

Благодарам Игор, од свое и од име на сите оние кои никогаш не ти се заблагодарија, а требаше.

Продолжи да шириш љубов!

Ти благодариме легендо!“

С. С. | Црнобело