„Незамислива трагедија“ - Пријателите се простуваат од Ристе Велков - нашиот оперски првенец загина со синот (20) во сообраќајка на обиколница

Детали

петок, 22 мај 2026

„Замина првенец на Македонската опера заедно со својот син во страшната сообраќајна несреќа синоќа... Искрено сочувство до семејството, блиските и сите колеги... Нека почиваат во мир, Царство небесно...“, пишува Мариани Џовани по страшната трагедија, во која изгубивме 4 наши сограѓани.

Македонија изгуби многу! Ристе Велков беше оперски солист првенец, еден од водечките македонски баритони, а пријателите и соработниците не можат да се соземат по страшната трагедија.

Баритонот на Македонската национална опера и балет Ристе Велков и неговиот 20-годишен син Адам Велков, се двајца од четворицата загинати во трагичната сообраќајна незгода што се случи ноќеска на скопската обиколница.

Според информациите, возило управувано од возач од Косово преминало во лентата на сега загинатите и го собрал нивното возило, кое изгорело.

Соработниците и пријателите се простуваат од Ристе Велков:

Мариани Џовани 

„Почивај во мир колега Ристе Велков...

Незамислива трагедија што ја потресе целата музичка и човечка јавност.....

Замина првенец на Македонската опера заедно со својот син во страшната сообраќајна несреќа синоќа...

Искрено сочувство до семејството, блиските и сите колеги...

Нека почиваат во мир, Царство небесно...“

Бранка Костиќ Марковиќ

„Вечна слава, Ристе... Нека ви е светол патот, на тебе и на твојот син.

Голема загуба за семејството и за твоите колеги од МОБ, како и за целокупната македонска култура. Длабоко сочуство до сите.

Нека почивааат во мир сите жртви на стравичната сообраќајна несреќа.

Многу е страшно ова, многу! Колку невини луѓе гинат секојдневно во Македонија, толку не гинат ниту во услови на војна“.

Благој Нацоски

„Драг Ристе, нека ти е лесна земја... Сочувство до семејството“.

Александар Стојчески

„Ахх... Нека ти е светол патот“.

Од Македонска опера и балет објавија:

„Со неизмерна тага и неверување ја примивме веста за трагичната смрт на првенецот на Македонската опера и балет, баритонот Ристе Велков, кој го загуби животот во сообраќајна несреќа.

Македонската оперска сцена изгуби исклучителен уметник, врвен интерпретатор и човек, чиј глас, уметност и сценско присуство оставија длабока трага во Македонската опера и балет и во македонската музичка култура.

Ристе Велков беше еден од водечките македонски баритони и еден од најхаризматичните оперски солисти. Роден е во 1975 година во Скопје, Република Македонија. Како реномиран солист – првенец на Македонската опера и балет, тој претежно настапува во белканто продукции, со што го заслужува и епитетот „италијански баритон со кадифена боја“.

Средното музичко образование го завршува во ДМБУЦ „Илија Николовски – Луј“ во Скопје во 1994 година, во класата на проф. Марија Николовска, смер соло-пеење. Дипломира на Факултетот за музичка уметност при Универзитет „Св. Кирил и Методиј“ во Скопје во 1999 година, во класата на м-р проф. Милка Ефтимова. Магистрира со највисока оцена cum laude во 2011 година на истиот факултет, во класата на м-р проф. Билјана Јовановска Јакимовска, смер соло-пеење.

Во периодот 1995–2000 година ги гради основите на оперското пеење кај македонскиот тенор Гога Трајанов. Своето уметничко усовршување го продолжува кај драмскиот тенор Стојан Стојанов Ганчев од Загреб, како и кај познатите италијански вокални педагози Антонио Бојер и Мирела Паруто, и светски познатиот романски баритон Николај Херлеа. Од 2001 до 2017 година се специјализира и го надградува својот репертоар во приватното оперско студио на бугарскиот баритон Стојан Попов во Софија.

Во 1996 година, како студент, дебитира во драмската претстава „Амадеус“ на сцената на Драмски театар – Скопје. Во 1998 година дебитира на „Мајски оперски вечери“ со улогата на Маруло во „Риголето“. Во 2009 година настапува на матичната сцена во Македонската опера и балет со насловната улога во „Набуко“. Во 2016 година настапува во продукција на Tokyo Opera во Јапонија, со улогата на Жорж Жермон во „Травијата“, во Performing Arts Center Ryutopia во Ниигата. Во 2017 година одржува солистички рецитал во Музеј-куќата на Борис Христов во Софија.

Велков гостува во Јапонија, Србија, Романија, Турција и Бугарија, а настапува на речиси сите значајни домашни фестивали и манифестации: „Охридско лето“, „Скопско лето“, „Штипско лето“, „Есенски музички свечености“, „Мајски оперски вечери“, „Интерфест“ – Битола и други.

Во текот на својата кариера реализираше голем број улоги, меѓу кои повеќе од 15 главни и водечки баритонски остварувања: Набуко („Набуко“), Риголето („Риголето“), Магбет („Магбет“), Грофот Луна („Трубадур“), Жорж Жермон („Травијата“), Дон Карло ди Варгас („Моќта на судбината“), Амонасро („Аида“), Ецио („Атила“), Енрико („Лучија од Ламермур“), Белкоре („Љубовен напиток“), Ескамиљо („Кармен“), Валентин („Фауст“), Шонар („Боеми“), Алфио („Кавалерија рустикана“), Силвио („Палјачи“), Таткото Петер („Ивица и Марица“), Сигизмунд – крал на Полска („Иван Сусанин“), Огнен („Цар Самуил“) и Вангел („Илинден“).

Неговата посветеност кон уметноста, впечатливите улоги и љубовта кон сцената ќе останат трајно запаметени.

Изразуваме искрено сочувство до неговото семејство, колегите, пријателите и сите што го познаваа и почитуваа. Слава му“.

С. С. | Црнобело