Елена Ристеска неутешна по смртта на Владо Јаневски: „Ќе ми недостигаш таков терсене каков што беше“

Детали

понеделник, 29 јуни 2026

„Иако се видовме на кафе пред неколку месеци, пак останавме недоречени, ама договорени да се доискажеме на следна средба која очигледно нема никогаш да се случи. Ќе ми недостига хуморот кој ретко го прикажуваше пред други“, вели Елена во својата емотивна порака. 

Заминувањето на Владо Јаневски во вечноста допре многу негови колеги. Дел од нив знаеле за болеста на познатиот музичар, други, пак, беа изненадени од веста дека починал, но сите со многу тага и емоции се простуваат од човекот кој ги напиша и испеа едни од најубавите и најемотивни љубовни песни кај нас, кого но нарекуваа Чаирскиот романтичар (а во интервју за CRNOBELO.com призна дека не го љубел многу овој епитет, но ете, му останал за цел живот).

Зад него ќе останат многу песни, хитови, многу анегдоти кои ќе ги раскажуваат неговите блиски луѓе, но и многу тага што почина прерано, на само 65 години.

Меѓу оние кои со многу емоции се простија од Владо е и Елена Ристеска, а таа, еден ден по смртта „му призна“ дека омилена песа како дете ѝ била „Корпичка“ - нешто што никогаш не му го кажала додека бил жив.

Во нејзината објава пишува:

„Ќе ми недостигаш Владе, ќе ми недостигаат нашите разговори за книги и автори, за музика, за животот, за нашата професија, нашите дружби…

Ќе ми недостигаш таков терсене каков што беше и баш заради тоа уникатен.

Ќе ми недостига хуморот кој ретко го прикажуваше пред други.

Иако се видовме на кафе пред неколку месеци, пак останавме недоречени, ама договорени да се доискажеме на следна средба која очигледно нема никогаш да се случи.

Фала ти за сѐ, за секој совет, за секој збор и мудрост, за секоја средба, за секоја книга споделена, за секоја песна…

И која песна да ја ставам сега кога секој текст ти е генијален и совршен… Можеби „Булки“ е правата за овој момент.

За жал многу музичари се собравте на таа страна, а многу болка оставивте на оваа…

Ах Владе... многу брзо замина, без збогување.

П.С. Никогаш не ти споделив дека како дете “Корпичка” ми беше омилена песна“.

А. Ј. | Црнобело