Летната школа на „Еуролинк“ поддржа 29 нови балетски таленти

Детали

вторник, 22 јули 2014

Дваесет и девет девојчиња на возраст од  9 до 11 години изминатите три седмици во рамките на летната балетска школа на „Еуролинк“ имаа можност трипати неделно да изучуваат класичен балет за почетници. Тие поминаа дел од летниот распуст на корисен и забавен начин, стекнувајќи навика за вежбање и за балетска дисциплина.

Летната балетска школа свечено се затвори во балетскиот училишен центар „Илија Николовски - Луј“ вo Скопје. Родителите имаа можност да проследат кратка претстава од она што го научиле нивните деца, а воедно, беа доделени сертификати за учество на сите млади балерини.

Само за потсетување, учесници на школата беа селектирани преку конкурс распишан од Еуролинк осигурување како дел од корпоративната платформа за општествена одговорност „Еуролинк - Вашата врска со вистинските вредности“ од познатиот професор по класичен балет, Горан Божинов,  уметнички директор на балетот при Македонската опера и балет, кој воедно ја реализираше и програмата на оваа школа.

- Со огромна исполнетост работев на овој проект, а уште поголемо беше задоволството да се работи со деца кои сакаат да ја изучуваат балетската уметност. Се надевам дека сите учесници беа задоволни од својот напредок и дека ќе продолжат со исто темпо, онаму каде што застанавме. Тие направија огромен исчекор кон остварување на своите детски соништа. Ова за нив беше само почеток кон зачекорување по стапките на уметничкиот живот, а јас искрено се надевам и верувам дека некои од овие дечиња некогаш ќе направат светска кариера, изјави Горан Божинов, уметнички директор на Балетот, при Македонската Опера и Балет при свеченото затворање на школата.

Олга Костовска, претседател на Надзорниот одбор на „Еуролинк осигурување“ на младите балерини им порача:

- Сон на секоја млада дама е да стане балерина. Се надевам дека оваа школа ќе биде само мал почеток што на овие 29 девојчиња ќе им даде голем поттик. Не само во желбата да станат балерини,  туку и да бидат што поуспешни во животот.