Филипче: Најголем број од новите случаи се од прослави, 65% во Скопје се од познат случај

Детали

понеделник, 08 јуни 2020

По тридневниот карантин во најзагрозените делови од Македонија, министерот Венко Филипче одржа прес-конференција за соопштување на понатамошни мерки.

Деталната состојба од последните 24 часа погледнете ја ТУКА.

На прес-конференцијата Филипче соопшти:

На Инфективната клиника има 71 пациент, нема пациенти на механичка вентилација.

Во болницата 8-ми септември има 42 пациенти, на респираторна машина има 8 пациенти и со потешка клиничка слика уште 7.

Во болницата во Битола има 13 пациенти, во Штип 24 и на инфективните одделенија во Тетово, Охрид, Куманово, Велес, Куманово и Прилеп хоспитализирани се 39 пациенти.

Таргетираното тестирање беше рана дијагностика за навремена изолација на сите контакти кои се носители на вирусот во рамките на познатите кластери.

Најголем број од заболените се заболени на семејни или други собири, па со оваа стратегија ги изолиравме сите контакти на заболените и оние без симптоми.

Полицискиот час за викендов дозволи полесен пристап и брзо тестирање на сите контакти, што беше отежнато претходно. И покрај отпорот на некои места сега има подобра соработка. Епидемиолозите полесно пристапуваа и тестираа. Апелирам до граѓаните коректно да соработуваат и да даваат точни податоци.

Огромен процент од новозаболените се со лесна клиничка слика или асимптоматски и од вкупниот број хоспитализирани само 8 пациенти се на механичка вентилација.

Изминатите денови направивме детална анализа за која ќе говорат Караџовски и Зибери. Околу 65% од активните случаи во Скопје се поврзани со познат случај, а 90% спаѓаат во 41 кластер. Слична е состојбата и во другите 3 кризни региони.

Оваа кластерска анализа покажа дека речиси сите нови случаи се врзани со некаква форма на собир околу 23, 24, 25 мај пред 2 недели.

Анализата во последните 7 дена покажа дека успеавме жариштата да ги задржиме во рамките на територијални целини. Една од дилемите која се појави е ширењето во другите општини во Скопје, надвор од првичните неколку кризни, а тоа е очекувано бидејќи градот функционира како целина и голем број од овие случаи се исто така резултат на собири.

Во периодот кој следи комисијата ќе предложи до Владата и ќе се дискутира за евентуална рестрикција на движењето.

Непочитувањето на мерките за заштита го донесе вториот бран и треба да извлечеме поука од тоа.

Караџовски ја претстави анализата и статистиката за изминатиот период, а вели дека оваа ситуација сега и зголемениот број случаи е заради непочитување на мерките за време на Бајрам. 

Погледнете ја прес-конференцијата за сите детали, статистика и изјави на Филипче, Караџовски и Зибери: