Анкета: Колку се променија вашите навики за транспорт во време на ковид пандемијата?

Детали

среда, 11 ноември 2020

Дали јавниот превоз го заменивте со индивидуален превоз со автомобил, или пак, се одлучивте за велосипед и е-тротинет откако настана пандемијата, a колкумина не го сменија начинот на транспорт? НаТочак подготвија анкета со што ќе се добие попрецизна слика за промените на превозот - ќе ви одземе само неколку минутки.

Неформалното здружение НаТочак постојано се залага за подобра велосипедска инфраструктура низ градот Скопје и ги поттикнува граѓаните што повеќе да го користат велосипедот како превозно средство.

Во продолжение ви ја пренесуваме идејата на неформалното здружение НаТочак кое во соработка со Здружение на граѓани Одржливи иницијативи изработи анкета, со цел да видат колку се променети навиките за транспорт и сообраќајот во време на пандемија, како и што може да се направи за да се зголеми користењето на велосипед како превозно средство:

Ковид пандемијата ги раздрма сите аспекти на нашето општество, во голема мера ни ги промени секојдневните навики, меѓу кои и оние како се движиме низ нашиот град.

Некои започнаа да работат од дома и помалку да се движат, некои го заменија јавниот превоз со велосипед или е-тротинет, некои го заменија споделениот превоз со автомобил со индивидуален превоз со автомобил.

Промените во навиките сигурно се случиле во повеќе насоки.

Како тие промени ќе влијаат на иднината на превозот по завршувањето на пандемијата, останува да видиме. Многу од европските и светските градови веќе размислуваат во таа насока.

Сметаме дека ќе биде корисно да ги документираме ставовите и искуствата од овој период за да можеме да бидеме поподготвени за иднината. 

Со анкетата на овој линк сакаме да добиеме попрецизна слика за промените на превозот општо, како и за ставовите во врска со возењето велосипед и потребите од менување на инфраструктурата, најмногу фокусирано на Скопје и Скопски регион.

Прашалникот е анонимен и одзема само неколку минути. Секој дополнителен одговор ќе ни значи.

Анкетата е изработена од неформалното здружение НаТочак во соработка со Здружение на граѓани Одржливи иницијативи.

Неодамна тие објавија неколку фотомонтажи во кои предлагаат решенија за одредени улици во Скопје, каде може да се спроведе соодветна велосипедска патека, а притоа сообраќајот на возила да се одвива непречено.

фото: Фејсбук НаТочак / depositphotos.com