Креативни учителки и дечиња од градинка во Скопје направија уметнички дела од пластични капачиња (фото)

Детали

петок, 23 април 2021

На тревникот во скопската градинка изникнаа прекрасни цветови, прошетаа инсекти, долетаа птици, се појави виножито, се разбранува морето - сето ова направено од пластични капачиња... Секоја чест и за учителките и за дечињата. Огромно браво!

Дека во Македонија постојат креативни учителки, кои на совршен начин ги инспирираат децата, доказ е градинката „Росица“ од скопската населба Ѓорче Петров.

Таму вчера, по повод 22 Април – Меѓународниот ден на планетата Земја, беа направени вистински уметнички дела од капачиња од шишиња.

На Фејсбук профилот на градинката објавија:

„Во нашата градинка многу често креативно рециклираме со различни материјали (хартија, цд, пластични шишиња и др.), но најпогодни за работа ни се пластичните капачиња, бидејќи се во различни бои и со нив децата многу лесно работат.

Оваа година за да го одбележиме 22-ри Април - Меѓународниот ден на планетата Земја, ги избравме токму нив за да направиме прекрасни изработки, со кои ги разубавивме нашите дворови.

Воспитувачите, негувателките и децата заедно, најпрво планираа какви изработки ќе прават , па потоа на шпер плочи, стиропор, пластични капаци редеа капачиња и ги одбираа боите, лепеа и креативно се изразуваа.

Така во тревите изникнаа прекрасни цветови, прошетаа инсекти, долетаа птици, се појави виножито, се разбранува морето.

Децата со радост ги шетаа своите родители меѓу изработките и се гордееја на својот труд. Минувачите и родителите зачудени и восхитени застануваа да погледнат и да се фотографираат.

И да не заборавиме, додека се подготвуваше овој проект, децата ги едуциравме како да ја чуваме нашата планета Земја од загадување за да остане зелена, чиста и здрава.

Планетата Земја е единствениот наш дом!

Затоа нека секој ден биде ден на планетата Земја!“

Нивните дела:

• 
• 
• 
• 
• 
• 
• 
• 
• 
• 
•  

С. С. | Црнобело / фото: Фејсбук