Две мечки од Скопје ЗОО испратени во резерват во Швајцарија – останатите две ќе добијат поголемо и поубаво живеалиште (фото)

Детали

недела, 22 мај 2022

Поради немање доволно простор, две од четирите мечки во Скопје ЗОО се испратени во резерват во Швајцарија, додека останатите две сега ќе добијат поголемо, но и поубаво живеалиште во зоолошката.

На официјалната Фејсбук страница на Скопје ЗОО открија дека две од мечките за коишто се грижеа се испратени во Швајцарија во резерват.

Од зоолошката истакнуваат дека живеалиштето на мечките е едно од постарите и нема доволно простор за четири мечки.

Затоа, две од нив испратиле во Швајцарија, додека другите две – Бим и Бум – сега ќе имаат повеќе простор, но и реновирано живеалиште.

Од Скопје ЗОО споделија и фотографии на кои се гледа како се одвивал транспортот, а ветуваат дека наскоро ќе имаме можност да погледнеме и видео од успешната мисија.

Нивната Фејсбук објава во целост:

„Скопје ЗОО и Four Paws International во уште една успешна мисија.

Двете мечки од скопската зоолошка отпатуваа во нов живот во резерватот во Швајцарија – Arosa Bearland Sanctuary.

Живеалиштето за мечки во нашата зоолошка е едно од постарите, а мечињата кои живеат тука уште од мали се донесени овде бидејќи останале без мајки поради човечки фактор и недозволен лов. Во недостиг на резерват за мечки во државата, секогаш тимот на ЗОО Скопје пробувале да помогнат на што повеќе мечки, но градината нема доволно простор за сите.

Во живеалиштето за мечките, до средата живееја четири мечки во три посебни делови. Бим и Бум во заеднички дел, а братот и сестрата кои имаат по 18 години во две посебни живеалишта. Не беше возможно да се направи реконструкција на живеалиштата, ниту пак редовно да се средуваат поради тоа што немаше начин ниту простор да се спојат сите четири мечиња“.

„Во разговор со нашите соработници од Four Paws, дојдовме до заеднички решение кое е хумано за сите четири мечки – братот и сестрата да заминат во преубавиот Ароса парк, а Бим и Бум да добијат трипати поголем простор и реновирано живеалиште по светски стандарди кое ќе го правиме со експертизата на Four Paws и искуствата од нивните резервати за мечки кои ги имаат низ Европа.

Благодарност до оваа најголема светска организација за заштита на животните за прекрасната соработка која ја имавме изминатиот период, бидејќи процесот за транспорт на двете мечки беше подолг, а нивниот и нашиот тим дадоа сè од себе мечките безбедно и здрави да пристигнат во Швајцарија. Работевме заедно деноноќно, сите среќни дека четирите мечки ќе имаат подобра иднина и поголема благосостојба. Во прилог фотографии од нашата заедничка мисија, а наскоро и видео од целиот пат. Продолжуваме и понатаму заеднички да се бориме за животните“.

Спирова С. | Црнобело