Залутана овца на паркингот во Градски трговски центар Скопје – никој не знае чија е и како се нашла таму (видео)

Детали

понеделник, 20 јуни 2022

Во група на Фејсбук беше споделено видео на кое се гледа залутана и исплашена овца на паркингот во ГТЦ Скопје. Според коментарите на објавата, не е познато чија е овцата ниту дали сега е згрижена, но подоцна е забележана и низ улиците на главниот град.

По коњот кој беше спасен од тераса во Дебар Маало, во Скопје се случи уште еден сличен инцидент, овојпат со залутана овца.

Во Фејсбук групата „Миленичиња“ беше споделено видео на кое се гледа овца која залутала во подземниот паркинг на Градскиот трговски центар.

„Ве молам кој може да интервенира, пријавив и во полиција и сè уште нема ништо. Овца во ГТЦ“, стои во описот на видеото.

Видеото беше споделено пред два дена, односно на 18-ти јуни, но според коментарите, уште не се знае како животното се нашло на паркингот, ниту што се случило потоа.

Во коментари, неколку Фејсбук корисници споделиле уште едно видео на кое се гледа истата овца покрај Vero Jumbo.

Некои корисници истакнуваат дека овцата би требало да биде згрижена во зоолошка и наводно од Зоолошката градина во Скопје веќе се погрижиле за неа.

Спирова С. | Црнобело