Невестата од Галичка свадба за CRNOBELO.com: „Носијата беше тешка, но горда сум што ја негуваме традицијата“

Детали

понеделник, 18 јули 2022

„Носијата беше тешка, но тоа не претставуваше никаков проблем за мене поради мојата голема желба“ – открива за CRNOBELO.com невестата од „Галичка свадба“, Елена Дуровска. Кои биле нејзините омилени делови од свадбата?

Викендов во Галичник се одржа 48-мото издание на автентичната културно-сценска манифестација „Галичка свадба“. Во рамки на манифестацијата судбоносното „Да“ според галичките обичаи и традиција годинава го кажаа Илчо Димитров и Елена Дуровска.

Зетот Илчо Димитров годинава ја имаше таа чест да ја носи личната народна носија на легендарниот Александар Сариевски, во чија чест на 15-ти беше организиран и јубилеен концерт, по повод 100 години од неговото раѓање и 20 години од смртта.

Претходно во изјава Илчо потврди дека тој потекнува од Галичник, а последниве 10 години редовно облекува носија на манифестацијата и е активен учесник. Неговата сопруга Елена Дуровска потекнува од Западна Македонија, од селото Битуше и рече дека се чувствува привилегирано што е дел од оваа манифестација.

Иако за многумина, свадбената церемонија што трае два дена, односно започна на 16-ти јули во саботата, а заврши во неделата (17.07) изгледа премногу долго Елена во изјава за CRNOBELO.com откри дека овој миг на годинешните младенци им поминал за миг.

„Почувствувавме позитивни емоции на среќа, радост и возбуда. Овој долгоочкуван момент за нас ни помина за миг“ – вели таа.

Автентичната носија што невестите ја носеле во Галичник е уникатна и препознатлива во светски рамки. Сепак, повеќеслојната носија на топлото време не претставувала проблем за Елена:

„Носијата беше тешка, но тоа не претставуваше никаков проблем за мене поради мојата голема желба.“

Што се однесува до омилените делови од свадбата, она што на Елена најмногу ѝ оставило впечаток од денот на свадбата е доаѓањето на коњаниците и поворката на сватовите и гледањето низ прстен на момчето.

„Сакам да им порачам на младите да ја негуваат нашата македонска традиција пренесена од нашите претци“ – порачува таа.

Погледнете уште неколку фотографии од манифестацијата во продолжение:

Б. С. Б. | Црнобело

фото: Фејсбук Стево Пендаровски