„Не сакам да просам по улици“ – јутјуберот Стефан Лазаров му помогна на младиот Неџат да најде стан и работа (видео)

Детали

среда, 02 ноември 2022

Додека многумина сонуваат за луксуз, 18-годишниот Неџат бараше само вработување и сместување, а благодарение на јутјуберот Стефан Лазаров животот на поранешниот штитеник на Домот за деца без родители целосно се промени во два дена.

Неџат имал само 4 години кога неговите родители го оставиле во згрижувачки дом, а откако наполнил 18 години тој треба сам да го најде вистинскиот пат.

Јутјуберот Стефан Лазаров претходно објави едно подолго видео во кое со неговите гледачи ја сподели тажната приказна на Неџат и во кое ги замоли луѓето да помогнат да се најде вработување и нов дом за момчето кое искрено откри дека во минатото спиел на улица и во кафези за картони.

Заради животните околности, Неџат во моментов е прва година средно образование во Државното училиште за физичка култура, а вели дека единствена желба му е да го заврши образованието.

„Мене ми треба само некој да ме насочи, не сакам да завршам на улица со просење, со крадење, со лажење. Јас сум единствен од моите 84 поголеми братучеди што не пуши цигари, не се дрогира и не консумира алкохол и сакам тоа да не се промени. Јас барам само работа, сместување и некој да ми го покаже патот“ – апелираше Неџат во првото видео.

Неколку дена подоцна, Стефан објави ново видео во кое се гледа дека успеале да најдат стан под кирија каде Неџат ќе може да живее, а веќе истиот ден тој требаше да почне на новото работно место.

Како што рече Стефан, на ова работно место, доколку се покаже во наредните седум дена, Неџат ќе биде добро платен, ќе има здравствено осигурување и ќе има голем број бенефиции како и останатите вработени.

„Сакам премногу да ви се заблагодарам на сите што ми помогнавте, бидејќи ова е втора шанса во мојот живот. Премногу сум среќен што имам стан и работа и ќе ве убедам дека нема да ја злоупотребам оваа моја втора шанса во животот“ – рече Неџат пред да влезе во својот нов дом.

Погледнете го видеото од новиот дом на Неџат:

 Б. С. Б. | Црнобело