Приказната за едно од најстарите дрвја во Македонија, 5-вековен јавор во село Теово

Детали

четврток, 05 јануари 2023

„Одамна, таму некаде во 15 век во ова место дошол некој Турчин. Сакал да остави белег дека бил тука. Засадил млада фиданка од јавор, а знаеме дека тој е симбол на вековитост и долготрајност. По седум векови од тогаш таа фиданка е нашиот симбол на селото“, велат оние малкумина кои ќе ги сретнете под јаворот во велешко Теово.

Локалците велат, симболот на велешкото село Теово е висок 30 до 40 метри, со пречник во основата на трупот од 2 до 3 метри.

Ако некогаш под крошната на столетното дрво се собирале генерации, сведоци на различни времиња, денес скоро и да нема никој.

Станува збор за јавор, кој како некогаш, така и ден-денес му пркоси на времето додека се разгранува низ вековите.

„Одамна, таму некаде во 15 век во ова место дошол некој Турчин. Сакал да остави белег дека бил тука. Засадил млада фиданка од јавор, а знаеме дека тој е симбол на вековитост и долготрајност. По седум векови од тогаш таа фиданка е нашиот симбол на селото“, велат оние малкумина кои ќе ги сретнете под јаворот во велешко Теово.

Петре Трајкоски, родум од тука, од местото каде Македонија го има едно од најстарите и најголемите дрвја, за CRNOBELO.com вели:

„Јаворот сам се крои, сам се чува. Ретко кој доаѓа и да го види, а не пак да го заштити. Да беше некаде во светот ќе беше вистинска туристичка атракција, кај нас ништо од тоа“.

Низ тесните сокаци на Теово може да слушнете многу легенди и преданија за тоа кој точно и како го насадил јаворот.

Една меѓу оние повеќе раскажуваните е и таа дека фиданката е насадена од првиот доселеник. Неговото име денес го носи селото.

Како што одминува времето, така мештаните кројат приказни за јаворот со гранки кои се вистински тешки стебла кои неуморно надвиснале среде село.

А тука, баш на среде село, јаворот посведочил бројни денски и ноќни седенки.

„Кога бевме деца, а тоа значи и не така скоро, немаше празник, а под јаворот да не се соберат стотици луѓе. За поголемите слави и празници доаѓаа луѓе од целата околина на Општина Чашка. На нас децата ни врзуваа лулашки на големите гранки“, со носталгија на едни времиња се сеќава Трајкоски.

Под јаворот кој неуморно брои седум века веќе нема кој ниту да доаѓа, ниту да се собира. Трајкоски со воздишка вели дека младите еднаш засекогаш го напуштаат Теово. Еднаш засекогаш му вртат грб и на родното огниште и на столетниот симбол на местото.

Го знаете ли вие ова дрво? 

©CRNOBELO.com Забрането преземање и копирање. Крадењето на авторски текстови е казниво со закон.

Д. Б. | Црнобело