Строгите правила што ѕвездите на Оскарите мора да ги следат (без разлика колку се богати и славни)

Можат да одат во тоалет само кога се прави пауза за реклами. Ако сепак излезат порано, тогаш нема да им дозволат да се вратат во салата сè до наредната пауза. Кои правила ги следат присутните на Оскари, без разлика колку се славни, богати и моќни?

Оскарите се кулминација на сезоната на награди, а го привлекуваат вниманието дури и на оние кои не се баш „филмаџии“.

Во театарот „Долби“ во Лос Анџелес се собираат најголемите филмски ѕвезди, па не изненадува што Оскарите се можеби најпрестижниот настан не само во Холивуд, туку во целиот свет.

Но, само затоа што во публиката седат влијателни и славни луѓе, не значи дека можат да прават што сакаат. Напротив, за сите гости, без исклучок, важат правила кои можат да се наречат и строги.

Кои правила ги следат ѕвездите на Оскарите?

Ограничено одење во тоалет

Штом ќе започне церемонијата, гостите не треба да ги напуштат своите места и ако им се оди во тоалет, треба да ја почекаат паузата за реклами.

Ако некој сепак излезе, тогаш не му дозволуваат да се врати во салата сè до наредната пауза.

„Испланирајте си го одењето во тоалетот за да можете да се вратите во салата пред да продолжи настанот, или нема да ви биде дозволено да влезете внатре сè од следната пауза“, стои во соопштение од 2013 година.

Не смеат да носат храна и пијалаци однадвор

Гостите не смеат да носат храна и пијалаци однадвор, дури ниту вода.

На настанот се обезбедени храна и пијалаци и гостите треба да се задоволат само со тоа.

Сепак, во 2014-та, Елен Деџенерис го прекрши правилото кога беше водителка на настанот и им служеше пица на гостите помеѓу презентациите.

Ограничена должина на говорите

Добитниците на Оскар треба да обрнат внимание на должината на нивниот говор.

Генерално, се препорачува говорот да не биде подолг од 45 секунди. Ако го надминат ова време, оркестарот почнува да свири за суптилно да ги избрка од сцената.

Сепак, разбирливо е што некогаш актерите го прекршуваат ова правило поради возбудата.

На пример, во 2025-та, Едриен Броди држеше говор кој траеше над пет минути откако освои Оскар за најдобар актер во главна улога за филмот The Brutalist.

Тој дури и го замоли оркестарот да престане со свирење бидејќи бил при крај.

Посебни правила за луѓето кои само пополнуваат седишта

На Оскарите има и луѓе кои не се дел од филмската индустрија и нивната единствена задача е да ги пополнат празните места во салата.

Тие треба да седнат празните места кога филмските ѕвезди ќе станат од своето столче, со цел салата да не изгледа празно.

За нив, пак, важат посебни правила – никако не смеат да им зборуваат на ѕвездите и не смеат да носат телефон.

Притоа, не добиваат никаков надомест, а сами треба да се организираат за превоз.

Добитниците не смеат да ја продадат својата статуетка

На добитниците им е забрането да ја продадат својата статуетка, а иако е позлатена, Академијата одредува дека нејзината цена е само еден долар.

„Добитниците не смеат да ја продадат или да се ослободат од нивната статуетка, ниту да дозволат да биде продадена, без прво да ѝ ја понудат на Академијата за сума од еден долар“, пишува на веб-сајтот на Оскарите.

Погледнете и: Забавни и непријатни моменти од Оскари 2026 + најсмешните твитови за настанот

Спирова С. | Црнобело