Смртни закани, актери даваат отказ: Зошто серијата Harry Potter се соочува со толку многу контроверзии (уште пред премиерата)?

Смртни закани за актерот што го глуми Снејп

Една од најголемите замерки што ја имаат фановите на франшизата е тоа што во серијата Снејп го глуми актерот Папа Есиеду кој е Афроамериканец. Во филмовите, Снејп е бел и го глуми Алан Рикман.

Снејп е опишан како личност со бела кожа и во книгите. Неколкупати пишува дека има „нездрав, блед и жолтеникав тен“, како и дека има „мермерно бела кожа“.

Поради ова, на голем дел од фановите не им се допаѓа што тој нема да биде бел во серијата.

Иако е очекувано не сите да се согласуваат со изборот на актери, актерот Папа Есиеду добивал и смртни закани.

Тој се огласи за ова, истакнувајќи дека се одразило на неговото психичко здравје.

„Ако отворам Инстаграм, гледам коментари како ’Ќе најдам каде живееш и ќе те убијам‘. Никој не треба да се соочува со нешто вакво поради својата работа. Никој не треба да си го ризикува животот за својата работа.

Јас глумам волшебник во Хари Потер и ќе лажам ако речам дека ова не ми влијае психички. Но, целата омраза ми дава и поттик. Ме тера да го направам овој лик само мој поради она што го чувствував како дете.

Се замислував себеси во Хогвортс, како летам на метла и помислата дека дете како мене ќе виде црн актер во таква улога, дополнително ме мотивира“.

Иако актерот самиот не ги пријавувал коментарите, по смртните закани, извршниот директор на HBO сподели дека го зајакнале обезбедувањето на актерите.

Крадење реквизити

Проблеми имало и на самиот сет, како крадењето реквизити.

Крадењето се случувало толку често, што на сите реквизитите, како метли и волшебни стапчиња, почнале да ставаат микрочипови за да можат да ги лоцираат.

Не е познато кој крадел, но честопати се случувало да исчезнуваат книги, стапчиња, па дури и лажна храна.

Кражбите сепак продолжиле, а продуцентите биле толку гневни што почнале да се закануваат дека секој што ќе биде фатен со украден реквизит, веднаш ќе биде отпуштен од проектот.

Актерката што ја глуми Џини даде отказ

Не толку многу во првата книга, но понатаму, Џини Визли е меѓу главните ликови во серијалот.

Но, неодамна, актерката што ја глуми Џини во серијата, Грејси, дала отказ.

„Поради непредивдливи околности, Грејси ја донесе одлуката да се повлече од улогата на Џини Визли во серијата Harry Potter, по првата сезона.

Периодот што го помина во светот на Harry Potter беше прекрасен и таа е многу благодарна за целиот продукциски тим што создаде незаборавно искуство“, споделија од нејзиното семејство.

Од HBO само изјавија дека ја поддржуваат нејзината одлука.

Но, не е познато зошто Грејси ја напуштила серијата, особено кога ќе се земе предвид дека во наредните осум години (колку што ќе трае серијата) може да ја направи една од најпознатите млади актерки во светот.

Спирова С. | Црнобело